राज्य महामार्ग परिवहन महामंडळाच्या परभणी येथील विभागीय नियंत्रक कार्यालय अंतर्गत येणाऱ्या ४ आगारामध्ये २६६ बसेस आहेत. यातील बहुतांश बसेस या मोडकळीस आलेल्या आहेत. त्यामुळे प्रवाशांना जीव मुठीत घेऊनच प्रवास पूर्ण करावा लागतो. विशेष म्हणजे चार आगारातील बसच्या दुरुस्तीसाठी वर्षाला ६ कोटी रुपयांचा खर्च करावा लागतो. त्यातच आता मागील वर्षभरापासून वारंवार लॉकडाऊन जाहीर करण्यात येत असल्याने या चारही आगारातील बसेस एका जागेवरच आहेत. त्यामुळे बसच्या नादुरुस्तीमध्ये आणखीनच भर पडली आहे. काही बसेसच्या काचा निखळल्या असून काही बसेसच्या शीट फाटल्या आहेत. त्यामुळे अगोदरच कोरोनामुळे आर्थिक कोंडीत सापडलेल्या एसटी महामंडळ प्रशासनाला बस सुरू करण्यापूर्वी बसेसची दुरुस्ती करण्याखेरीज पर्याय उरलेला नाही. त्यामुळे यावर्षी बसेसच्या दुरुस्तीसाठी लागणाऱ्या निधीमध्ये मोठी वाढ होण्याची शक्यता नाकारता येणार नसल्याचे मंगळवारी परभणी येथील आगारात उभ्या असलेल्या बसेसची पाहणी करताना दिसून आले.
वर्षातून केवळ अडीच महिने रस्त्यावर
मार्च २०२०पासून जिल्ह्यामध्ये कोरोनाविषाणूच्या पार्श्वभूमीवर वारंवार संचारबंदी, लॉकडाऊन जाहीर करण्यात येत आहे. त्यामुळे एसटी महामंडळाची सेवा जिल्हा प्रशासनाच्या आदेशानुसार बंद ठेवावी लागते. विशेष म्हणजे वर्षभरातून केवळ अडीच महिन्यात बस रस्त्यावरून धावली आहे. त्यामुळे एसटी महामंडळ प्रशासनाला या वर्षभरात मोठा आर्थिक फटका सहन करावा लागला आहे.
साडेसहा कोटींचा येणार खर्च
परभणी जिल्ह्यातील चार आगारातील 266 बसच्या नियमित दुरुस्तीसाठी सहा कोटी रुपयांचा खर्च करावा लागतो. मात्र कोरोनाच्या पार्श्वभूमीवर वर्षभरापासून काही बसेस एका जागेवरच उभे आहेत. त्यामुळे या बसेस सुरू करण्यासाठी किमान 50 लाख रुपयांचा खर्च वाढणार आहे. परिणामी वर्षाकाठी साडेसहा कोटी रुपयांचा खर्च बस दुरुस्तीसाठी होण्याची शक्यता आहे.
कोरोनाच्या काळात बस आगारांमध्ये उभ्या जरी असल्या तरी नियमितपणे त्यांची देखभाल दुरुस्ती करण्यात येते. वरिष्ठ कार्यालयाच्या निर्देशानुसार बसेसची दुरुस्तीसह इतर कामकाज कर्मचाऱ्यांकडून नियमित केले जातात. त्यामुळे एकाच जागेवर वर्षभरापासून उभ्या असलेल्या बसेस नादुरुस्त होण्याचा प्रश्न उद्भवत नाही.
मुक्तेश्वर जोशी, विभागीय नियंत्रक, परभणी