आप सोडताच राघव चड्ढांच्या लोकप्रियतेला ओहोटी; भाजप प्रवेशानंतर ११ लाख इन्स्टाग्राम चाहत्यांनी फिरवली पाठ

भाजपमध्ये प्रवेश केल्यानंतर राघव चड्ढा यांना इंस्टाग्रामवर मोठा फटका बसला आहे.

राजकारणातील युथ आयकॉन आणि ग्लॅमरस चेहरा म्हणून ओळखले जाणारे राघव चड्ढा यांना सोशल मीडियावर मोठा धक्का बसला आहे. त्यांनी भाजपमध्ये प्रवेश करताच अवघ्या ४८ तासांत तब्बल ११ लाख लोकांनी त्यांना इंस्टाग्रामवर अनफॉलो केले आहे. 'आप'शी केलेली गद्दारी तरुणाईला रुचलेली नसल्याचेच या आकडेवारीवरून दिसत आहे.

१४.६ वरून १३.५ मिलियनवर घसरण!

२३ एप्रिलपर्यंत राघव चड्ढा यांच्या इंस्टाग्राम फॉलोअर्सची संख्या १४.६ मिलियन इतकी होती. मात्र, २४ एप्रिल रोजी त्यांनी भाजपचा झेंडा हाती घेतल्यावर फॉलोअर्स वेगाने कमी होऊ लागले. सध्या ही संख्या १३.५ मिलियनवर आली असून, ती अजूनही सातत्याने घटत आहे. धक्कादायक बाब म्हणजे, लोक राघव यांना अनफॉलो करतानाचे व्हिडिओ बनवून सोशल मीडियावर शेअर करत आहेत.

'Gen Z' का झाला नाराज?

राघव चड्ढा यांनी संसदेत गिग वर्कर्सचे प्रश्न, एअरपोर्टवरील महागडे समोसे आणि १० मिनिटांत होणारी डिलिव्हरी यांसारख्या तरुणांच्या जिव्हाळ्याच्या विषयांवर आवाज उठवला होता. अगदी स्वतः डिलिव्हरी बॉय बनून त्यांनी तरुणांची मने जिंकली होती. मात्र, भाजपमध्ये जाताच त्यांनी पंतप्रधान मोदींविरोधातील आपल्या जुन्या पोस्ट डिलीट केल्या. हीच गोष्ट त्यांच्या चाहत्यांना खटकली आहे. "राघव यांनी तत्त्वांपेक्षा सत्तेला महत्त्व दिले," अशी भावना सोशल मीडिया युजर्स व्यक्त करत आहेत.

नेत्यांपासून गिर्यारोहकांपर्यंत सर्वांचाच पाठ फिरवला

केवळ सामान्य जनताच नाही, तर अनेक क्षेत्रांतील नामवंतांनीही राघव यांची साथ सोडली आहे. विना ऑक्सिजन माऊंट एलब्रस सर करण्याचा विक्रम प्रस्थापित करणारे प्रसिद्ध गिर्यारोहक रोहताश खिलेरी यांनीही राघव यांना अनफॉलो केले आहे. शरद पवार यांच्या राष्ट्रवादीचे नेते अनीश गवांडे यांनीही टोला लगावला की, "इंटरनेट तुम्हाला रातोरात हिरो बनवू शकते आणि रातोरात झिरो देखील!"

'#UnfollowRaghavChadha' ट्रेंडिंगवर

सोशल मीडिया प्लॅटफॉर्म ट्विटरवर सध्या #UnfollowRaghavChadha हा हॅशटॅग ट्रेंड होत आहे. 'आप'चे नेते सौरभ भारद्वाज यांनी टीका केली की, राघव यांच्या टाइमलाइनवर आता मोदींच्या स्तुतीव्यतिरिक्त काहीच उरलेले नाही. एकेकाळी स्वतःची स्वतंत्र राजकीय ओळख निर्माण करू पाहणारा हा तरुण नेता आता भाजपच्या लाटेत आपली लोकप्रियता गमावताना दिसत आहे.