पश्चिम बंगालमध्ये निवडणुकीनंतर हिंसाचार सुरूच! हावड्यात भाजप कार्यकर्त्यांवर बॉम्बफेक; पाच जण गंभीर

मिळालेल्या माहितीनुसार, भाजप कार्यकर्ते स्थानिक लोकांशी संवाद साधत असताना, चार हल्खोर एका दुचाकीवरून तेथे पोहोचले आणि भाजप कार्यकर्त्यांच्या दिशेने एका पाठोपाठ एक असे तीन बॉम्ब फेकून पळून गेले, असे  प्रत्यक्षदर्शींनी सांगितले आहे.

यावेळी पश्चिम बंगालच्या विधानसभा निवडणुकीत तेथील जनतेने ममता बॅनर्जी यांच्या तृणमूल काँग्रेसला सत्तेवरून खाली खेचत, भाजपला बहुमताने सत्तेच्या सिंहासनापर्यंत पोहोचलवे आहे. या विधानसभा निवडणुकीनंतर तेथे उसळलेला हिंसाचार अद्यापही थांबण्याचे नाव नाही. बुधवारी रात्रीच्या सुमारास हावडा येथे बॉम्बफेक करून भाजप कार्यकर्त्यांना लक्ष्य करण्यात आल्याचे वृत्त आहे.  या हल्ल्यात ५ भाजप कार्यकर्ते गंभीर जखमी झाले आहेत. त्यांना उपचारासाठी आरजी कर रुग्णालयात दाखल करण्यात आले आहे. पाणीहाटी येथील वॉर्ड क्रमांक २ मधील दत्त रोड परिसरात ही घटना घडली. 

मिळालेल्या माहितीनुसार, भाजप कार्यकर्ते स्थानिक लोकांशी संवाद साधत असताना, चार हल्खोर एका दुचाकीवरून तेथे पोहोचले आणि भाजप कार्यकर्त्यांच्या दिशेने एका पाठोपाठ एक असे तीन बॉम्ब फेकून पळून गेले, असे  प्रत्यक्षदर्शींनी सांगितले आहे. यानंतर परिसरात प्रचंड तणाव निर्माण झाला आहे. खर्डा पोलीस आणि केंद्रीय राखीव दलाच्या जवानांनी परिस्थिती नियंत्रणात आणली आहे. दरम्यान, हा हल्ला तृणमूल काँग्रेस पुरस्कृत गुंडांनी केल्याचा आरोप भाजपने केला आहे. मात्र तृणमूलने हा आरोप फेटाळून लावला आहे.

भाजप कार्यकर्त्यावर गोळीबार -
याशिवाय, पश्चिम बंगालमधील इतरही ठिकाणांवरून हिंसाचाराच्या घटना समोर येत आहेत. उत्तर २४ परगना जिल्ह्यातील बशीरहाट परिसरात रोहित राय या भाजप कार्यकर्त्यावर गोळीबार करण्यात आला. रोहित राय आपल्या भागात पक्षाचे झेंडे लावत असताना तृणमूलच्या कार्यकर्त्यांनी त्यांच्यावर गोळी झाडली, असा दावा भाजपने केला आहे. 

रोहित राय यांच्या पोटात गोळी लागली असून त्यांना रुग्णालयात दाखल करण्यात आले आहे. त्यांची प्रकृती सध्या स्थिर आहे. याच बरोबर, उत्तर कोलकात्याच्या बारानगर भागातही एका भाजप कार्यकर्त्यावर चाकूने हल्ला करण्यात आला आहे. यासंदर्भात पोलीस सीसीटीव्ही फुटेजच्या मदतीने आरोपींचा शोध घेत आहेत.