पीएनजी ग्राहकांना आता एलपीजी सिलिंडर नाही; गॅस सिलिंडर तुटवड्याच्या पार्श्वभूमीवर केंद्राचे निर्बंध

यासंदर्भात पेट्रोलियम व नैसर्गिक वायू मंत्रालयाने १४ मार्चला अधिसूचना काढत, अत्यावश्यक वस्तू कायद्यांतर्गत येणाऱ्या ‘द्रवीकृत पेट्रोलियम गॅस (पुरवठा व वितरण नियमन) आदेश- २०००’ मध्ये सुधारणा केली आहे. ज्या ग्राहकांकडे पीएनजी कनेक्शन आहे, त्यांना घरगुती एलपीजी जोडणी त्वरित परत करणे अनिवार्य केले आहे. 

नवी दिल्ली : मध्य पूर्वेतील संघर्षामुळे जागतिक ऊर्जा संकट निर्माण झाल्याने खबरदारी म्हणून केंद्र सरकारने ‘पाइपद्वारे स्वयंपाकाचा गॅस’ (पीएनजी) कनेक्शन असणाऱ्या कुटुंबांना अनुदानित एलपीजी सिलिंडर ठेवण्यास किंवा नव्याने खरेदी करण्यास बंदी घातली आहे. तसेच गॅस पुरवठ्यावर आलेला ताण कमी करण्यासाठी पीएनजीच्या विस्ताराला गती देण्याचे निर्देश नियामक संस्थांना केंद्र सरकारने दिले आहेत. 

यासंदर्भात पेट्रोलियम व नैसर्गिक वायू मंत्रालयाने १४ मार्चला अधिसूचना काढत, अत्यावश्यक वस्तू कायद्यांतर्गत येणाऱ्या ‘द्रवीकृत पेट्रोलियम गॅस (पुरवठा व वितरण नियमन) आदेश- २०००’ मध्ये सुधारणा केली आहे. ज्या ग्राहकांकडे पीएनजी कनेक्शन आहे, त्यांना घरगुती एलपीजी जोडणी त्वरित परत करणे अनिवार्य केले आहे. 

...तर एलपीजी कनेक्शन ठेवता येणार नाही
एकाच वेळी पीएनजी आणि घरगुती एलपीजी हे दोन्ही कनेक्शन असणाऱ्या व्यक्तीला घरगुती एलपीजी कनेक्शन कायम ठेवता येणार नाही. यासोबतच दोन्ही कनेक्शन असल्यास कोणत्याही सरकारी तेल कंपनीकडून किंवा त्याच्या वितरकांमार्फत एलपीजी सिलिंडर पुन्हा भरून घेता येणार नाही.

अशा व्यक्तींनी त्यांच्याकडील घरगुती एलपीजी कनेक्शन त्वरित रद्द करणे आवश्यक असल्याचे सरकारी तेल कंपन्या व त्यांच्या वितरकांना मंत्रालयाने  दिलेल्या आदेशात म्हटले आहे.