चिनी जहाजांसाठी होर्मुझ पुन्हा उघडले; ट्रम्प-जिनपिंग चर्चा सुरू असताना इराणचा निर्णय

होर्मुझ सामुद्रधुनीवरून चीनच्या जहाजांना मार्ग देण्याचा निर्णय इराणने घेतला आहे. अमेरिकेचे राष्ट्राध्यक्ष डोनाल्ड ट्रम्प आणि चीनचे राष्ट्राध्यक्ष शी जिनपिंग यांच्यात बीजिंगमध्ये झालेल्या चर्चेदरम्यान हा महत्त्वपूर्ण घडामोडी समोर आली. 

बीजिंग : पश्चिम आशियातील युद्धाच्या पार्श्वभूमीवर जागतिक तेलवाहतुकीसाठी अत्यंत महत्त्वाची असलेल्या होर्मुझ सामुद्रधुनीवरून चीनच्या जहाजांना मार्ग देण्याचा निर्णय इराणने घेतला आहे. अमेरिकेचे राष्ट्राध्यक्ष डोनाल्ड ट्रम्प आणि चीनचे राष्ट्राध्यक्ष शी जिनपिंग यांच्यात बीजिंगमध्ये झालेल्या चर्चेदरम्यान हा महत्त्वपूर्ण घडामोडी समोर आली. 

बुधवारी रात्रीपासून चीनच्या ३० जहाजांना सामुद्रधुनीतून मार्ग देण्यात आल्याचे इराणच्या रिव्होल्युशनरी गार्डच्या नौदल अधिकाऱ्यांनी सांगितले.

'नवा दृष्टिकोन'

९ वर्षांनंतर पहिल्यांदाच अमेरिकेच्या राष्ट्राध्यक्षांनी चीनचा दौरा केला. या भेटीत दोन्ही नेते द्विपक्षीय संबंध सुधारण्यासाठी 'नव्या दृष्टिकोनावर' सहमत झाले. जिनपिंग यांच्या मते, हा दृष्टिकोन पुढील तीन वर्षांसाठी दोन्ही देशांच्या संबंधांना दिशा देणारा ठरेल. एकमेकांचे स्पर्धक होण्याऐवजी भागीदार म्हणून काम करायचे आहे, असे आवाहनही त्यांनी यावेळी केले. 

'तैवान'च्या स्वातंत्र्याला पाठिंबा दिल्यास संघर्ष अटळ 

चीन अमेरिकेला तैवानच्या मुद्द्यावर 'अतिदक्षता' बाळगण्याचा सल्ला देत जिनपिंग यांनी तैवानच्या स्वातंत्र्याला पाठिंबा देणे हे शांततेच्या मार्गातील सर्वात मोठा अडथळा असल्याचे म्हटले. जर तैवानचा प्रश्न नीट हाताळला गेला, तर संबंध स्थिर राहतील; अन्यथा दोन्ही देशांना गंभीर परिणामांना सामोरे जावे लागेल, असा इशारा त्यांनी दिला.