बाप रे! एसी सुरू करताच थंड हवेऐवजी बाहेर आले ३ विषारी साप; समोरचे दृश्य पाहून कुटुंबाची उडाली झोप

भीषण उष्णतेपासून सुटका मिळवण्यासाठी जेव्हा आपण एसी लावतो, तेव्हा त्यातून थंड हवा येईल अशीच आपली अपेक्षा असते. मात्र, गुजरातच्या वलसाड जिल्ह्यातील पारडी भागात एका कुटुंबाला असा अनुभव आला की, त्यांची अक्षरशः त्रेधातिरपीट उडाली. एसी सुरू करताच त्यातून एक-दोन नव्हे, तर चक्क तीन विषारी साप बाहेर डोकवू लागले. हा प्रकार पाहताच घरातल्यांच्या तोंडचे पाणी पळाले आणि एकच किंकाळी फुटली.

नेमकं काय घडलं?

वलसाडच्या पो रेल्वे परिसरात राहणाऱ्या एका मध्यमवर्गीय कुटुंबाने दुपारी एसी सुरू केला. थोड्याच वेळात एसीच्या वेंट्समधून काहीतरी हालचाल होत असल्याचं त्यांच्या लक्षात आलं. नीट निरखून पाहिलं असता तिथे सापाचे वेटोळे असल्याचा भास झाला. एकामागून एक तीन साप एसी युनिटमध्ये रेंगाळताना दिसले. घरात मुले आणि महिला असल्याने मोठी भीती पसरली होती. मात्र, कुटुंबाने तत्काळ सावधानता बाळगत एसी बंद केला आणि खोलीबाहेर धाव घेतली.

रेस्क्यू टीमही झाली अवाक्!

घटनेची माहिती मिळताच स्थानिक जीवदया एनजीओच्या सर्प मित्रांना बोलावण्यात आले. रेस्क्यू टीमने जेव्हा एसी युनिट उघडले, तेव्हा त्यांनाही धक्का बसला. एकाच एसीमध्ये तीन विषारी साप इतक्या सुरक्षितपणे कसे काय बसले होते, हे पाहून तज्ज्ञही चकित झाले. बराच वेळ चाललेल्या रेस्क्यू ऑपरेशननंतर तिन्ही सापांना सुरक्षितरीत्या बाहेर काढून जंगलात सोडण्यात आले.

एसीमध्ये साप आले कुठून?

साप एसीमध्ये कसे शिरले, याचे गूढ अद्याप कायम आहे. मात्र, तज्ज्ञांच्या मते एसीच्या ड्रेन पाईप किंवा भिंतीमधील एखाद्या फटीवाटे हे साप आत शिरले असण्याची दाट शक्यता आहे. या घटनेचा व्हिडिओ सध्या सोशल मीडियावर तुफान व्हायरल होत असून, तो पाहून नेटकऱ्यांच्याही अंगावर काटा येत आहे.

'या' टिप्स फॉलो करा:

भीषण उष्णतेत साप थंड आणि ओलावा असलेल्या जागांच्या शोधात असतात. एसी युनिट त्यांच्यासाठी हक्काची जागा ठरू शकते. त्यामुळे खबरदारी घेणे गरजेचे आहे. एसीच्या ड्रेन पाईपच्या तोंडाशी बारीक जाळी बसवून घ्या. एसीची वेळोवेळी सर्व्हिसिंग करत राहा, जेणेकरून आत काही अडकले असल्यास समजेल. घराभोवती झुडपे किंवा कचरा साचू देऊ नका, तिथे साप आश्रय घेऊ शकतात. बराच काळ बंद असलेला एसी सुरू करण्यापूर्वी युनिटची बारकाईने तपासणी करा.