Manikarnika Ghat Demolition News: वाराणसीतील मणिकर्णिका घाटावर सुशोभीकरणाचे काम हाती घेण्यात आले आहे. त्यासाठी काही ठिकाणी पाडकाम करण्यात आले असून, त्यावरून राजकारण तापले आहे. गेल्या दोन दिवसांपासून संतप्त प्रतिक्रिया उमटत आहेत. सोशल मीडियावर व्हिडीओ, फोटो व्हायरल होत आहेत. यातील काही फोटो कृत्रिम बुद्धिमत्ता तंत्रज्ञानाच्या मदतीने तयार केले गेले असल्याचे प्रशासनाने सांगितले आहे. हेच फोटो व्हायरल करून समाजात भ्रम निर्माण केला जात असल्याचे सांगत गुन्हा दाखल करण्यात आला आहे.
वाराणसी पोलिसांनी मणिकर्णिका घाटावर सुरू असलेल्या पुनर्विकासाच्या कामाबद्दल सोशल मीडियावर एआय फोटो, व्हिडीओ आणि दिशाभूल करणारी माहिती पसरवल्याप्रकरणी आपचे खासदार संजय सिंह आणि काँग्रेसचे खासदार पप्पू यादव यांच्यासह ८ जणांविरोधात गुन्हा दाखल केला आहे.
पोलिसांनी काय सांगितले?
आठ लोकांविरोधात पोलिसांकडे तक्रार करण्यात आली होती. पोलिसांनी तक्रारीची दखल घेत गुन्हा दाखल केला. पोलीस उपायुक्त गौरव बन्सल यांनी सांगितले की, "मणिकर्णिका घाटावर सुशोभीकरण आणि स्मशान सुविधा वाढवण्याचे काम सुरू आहे. त्याबद्दल दिशाभूल करणारी माहिती, फोटो आणि व्हिडीओ प्रसारित केल्याप्रकरणी ८ व्यक्ती आणि काही एक्स (पूर्वीचे ट्विटर) अकाऊंट विरोधात गुन्हा दाखल करण्यात आला आहे. भारतीय न्याय संहितेतील संबंधित कलमान्वये हा गुन्हा दाखल करण्यात आला आहे", बन्सल यांनी सांगितले.
गुन्हा दाखल होताच संजय सिंह भडकले
वाराणसी पोलीस ठाण्यात शनिवारी या प्रकरणी एफआरआय दाखल केली गेली. पोलिसांनी गुन्हा दाखल केल्यानंतर खासदार संजय सिंह म्हणाले, "पंतप्रधान नरेंद्र मोदी यांच्या लोकसभा मतदारसंघाती मणिकर्णिका घाट उद्ध्वस्त करण्यात आला आहे. मंदिरे तोडली गेली आहेत. काशी विश्वेश्वरांच्या मंदिराचा जीर्णोद्धार करणाऱ्या पुण्यश्लोक अहिल्यादेवी होळकर यांची मूर्ती तोडण्यात आली. त्याचा साधुसंतांनी वाराणसीमध्ये विरोध केला."
"अहिल्यादेवी होळकर यांच्या वारसदारांनीही याचा विरोध केला आहे. इतकंच काय तर लोकसभेच्या माजी अध्यक्षा सुमित्रा महाजन यांनीही याला विरोध केला आहे. पण, माझ्याविरोधात एफआरआय दाखल कऱण्यात आला आहे. मंदिर तोडणाऱ्या पापी लोकांवर कारवाई करा. मला घाबरवण्याचा प्रयत्न करू नका", असा संताप खासदार संजय सिंह यांनी व्यक्त केला.
धार्मिक भावना भडकावण्याचा प्रयत्न
सहायक पोलीस आयुक्त अतुल अंजान त्रिपाठी म्हणाले, "खासदार संजय सिंह, खासदार पप्पू यादव यांच्यासह आठ जणांविरोधात गुन्हा दाखल केला गेला आहे. त्यांनी जाणीवपूर्वक दिशाभूल करणारी माहिती पसरवून धार्मिक भावना भडकावल्याचा आरोप आहे. मणिकर्णिका घाटावर सुरू असलेल्या पाडकामाबद्दल एक एआय व्हिडीओ सोशल मीडियावर पसरवण्यात आला. त्यात चुकीच्या पद्धतीने माहिती दिली गेली आहे."
Web Summary : Controversy erupts over Manikarnika Ghat redevelopment in Varanasi. Police filed FIR against MPs Sanjay Singh, Pappu Yadav, and others for spreading misleading AI-generated content regarding demolition, inciting religious sentiments.
Web Summary : वाराणसी में मणिकर्णिका घाट के पुनर्विकास पर विवाद। पुलिस ने सांसद संजय सिंह, पप्पू यादव और अन्य के खिलाफ भ्रामक एआई-जनित सामग्री फैलाने, धार्मिक भावनाओं को भड़काने के आरोप में एफआईआर दर्ज की।