निषेध : कामबंद आंदोलनाकडे लक्ष वेधण्याचा प्रयत्नपालिका कर्मचाऱ्यांचा मोर्चा

निषेध : कामबंद आंदोलनाकडे लक्ष वेधण्याचा प्रयत्नपालिका कर्मचाऱ्यांचा मोर्चा

नाशिक : आपल्या विविध मागण्यांकडे शासनाचे लक्ष वेधण्यासाठी नगरपालिका कामगारांनी सटाणा, मनमाड येथे मोर्चा काढून संबंधिताना निवेदन दिले. मागील सात दिवसांपासून या कामगारांनी कामबंद आंदोलन सुरू केले आहे; मात्र त्याकडे शासनाने लक्ष न दिल्याने या निषेध मोर्चाचे आयोजन करण्यात आले होते. सटाणा : सटाणा नगर परिषदेच्या कामगारांनी तहसील कार्यालयावर मोर्चा नेऊन तहसीलदार अश्विनीकुमार पोतदार यांना निवदेन दिले.सात दिवसांपासून सटाणा नगरपालिका कामगारांनी आपल्या न्याय हक्कासाठी बेमुदत कामबंद आंदोलन सुरू ठेवले असून, शासनाने दखल घ्यावी यासाठी आज कामगारांनी छत्रपती शिवाजी महाराज यांच्या पुतळयास पुष्पहार अर्पण करून सिटू सलंग्न संघटनेचे अध्यक्ष सुभाष पाटील यांच्या नेतृत्वाखाली मोर्चा काढला. यावेळी तहसीलदार पोतदार यांना निवेदन देण्यात आले.आपल्या मागण्यांसाठी सिटू संलग्न कामगारांनी बेमुदत उपोषण सुरू केले असून, उपोषणात अध्यक्ष सुभाष सोनवणे, दिनकर सोनवणे, पोपटराव सोनवणे, माधव मेणे, अनिल सोनवणे, सुनील सोनवणे, विजय सोनवणे, खंडू जाधव, हिरालाल कापडणीस, रामसिंंग पवार, सतीश सोनवणे, बाजीराव सोनवणे सहभागी झाले आहेत. मनमाड : प्रलंबित मागण्यांकडे शासनाचे लक्ष वेधण्यासाठी पालिका कर्मचाऱ्यांनी गेल्या सात दिवसांपासून कामबंद आंदोलन पुकारले आहे. या आंदोलनामुळे शहरातील कामकाज ठप्प झाले असून, त्याचा परिणाम दैनंदिन जनजीवनावर झाला आहे.महाराष्ट्र रोजंदार नगरपालिका कर्मचारी कृती समिती, मुन्सिपल कर्मचारी कामगार सेना, महाराष्ट्र नगरपालिका कर्मचारी संघटना (सिटू), रिपब्लिकन एम्प्लॉइज फेडरेशन यांच्या नेतृत्वाखाली आंदोलन करण्यात येत आहे. कामगारांच्या न्याय्य हक्कासाठी सुरू असलेल्या या आंदोलनाला अनेक पक्ष व संघटनांचे पदाधिकारी भेट देऊन पाठिंबा दर्शवत आहेत.या आंदोलनाची दखल घेण्यात न आल्याने अखेर कर्मचाऱ्यांनी शहरातून निषेध मोर्चा काढला. मोर्चाचा समारोप एकात्मता चौकात करण्यात आला. यावेळी विविध पदाधिकाऱ्यांनी मनोगतातून कर्मचाऱ्यांची भूमिका मांडली. मोर्चामध्ये शासनाच्या विरोधात घोषणाबाजी करण्यात आली. आंदोलनकर्त्या महिलांनी काळी साडी परिधान करून तर पुरुषांनी काळे उपरणे खांद्यावर घेऊन निषेध व्यक्त केला. यावेळी रामदास पगारे, नितीन पाटील, किरण अहेर, दीपक धिवर, रवींद्र वाघेले, मनोज फटांगळे, प्रमोद सांगळे, गणेश गरुड यांच्यासह कर्मचारी व कामगार उपस्थित होते. (वार्ताहर)