एनएक्स हॉटेलजवळून दुचाकी चोरी
मालेगाव : शहरातील एनएक्स हॉटेलजवळून ४० हजार रुपये किमतीची हीरोहोंडा कंपनीची स्प्लेंडर दुचाकी (क्र. एमएच ४१ एटी ९५८९) ही अज्ञात चोरट्याने चोरून नेली. मोहंमद इस्माईल शब्बीर अहमद (४७) यांनी किल्ला पोलिसात खबर दिली. अधिक तपास उपनिरीक्षक गोपाळ करीत आहेत.
---------------
महामार्गावर अपघात; एक ठार
मालेगाव : मुंबई - आग्रा महामार्गावर हॉटेल प्रभूजवळ भरधाव वेगात जाणाऱ्या कारने धडक दिल्याने नानाजी राघो पिंपळसे (३०, रा. मुंगसे) हा ठार झाला. गेल्या सोमवारी सायंकाळी ६ वाजेच्या सुमारास हा अपघात झाला. कार (क्र. एमएच ०६ जे ८३८९) चालकाविरोधात तालुका पोलिसात गुन्हा दाखल करण्यात आला. संजय देवचंद माळी (४६, रा. मुंगसे) यांनी फिर्याद दिली. आरोपीने भरधाव वेगात मालेगावकडून नाशिककडे कार चालवून नेताना रस्त्याच्या कडेला बसलेल्या नानाजी पिंपळसे यांना धडक दिली. यात त्यांच्या डोक्यास व मांडीस गंभीर दुखापत होऊन त्यांचा मृत्यू झाला. त्यांच्या मरणास कारणीभूत होऊन अपघाताची खबर न देता पळून गेला म्हणून कार चालकाविरोधात गुन्हा दाखल करण्यात आला. अधिक तपास सहाय्यक पोलीस निरीक्षक खैरनार करीत आहेत.
----------------
बनावट जातीचा दाखला बनविल्याप्रकरणी गुन्हा
मालेगाव : खोटे प्रतिज्ञा पत्र देऊन जातीचा बनावट दाखला बनवून फसवणूक केल्याप्रकरणी अलका पवन ठाकूर व इतर ४ जण रा. हिंमतनगर, कॅम्प यांचेविरुद्ध छावणी पोलिसात गुन्हा दाखल करण्यात आला. ११ मार्च ते २९ ऑगस्ट २०२० दरम्यान ही घटना घडली. नायब तहसीलदार दिलीप बाबूराव वाणी यांनी छावणी पोलिसात फिर्याद दिली. पोलिसांनी ठकबाजीचा गुन्हा दाखल केला. आरोपी दोघांनी अलका ठाकूर हीस जातीचा दाखला मिळवून देण्यासाठी सेतू कार्यालयात आणले. तिला हिंदू भिल्ल जातीचा दाखला मिळण्यासाठी आरोपींच्या मदतीने सेतू कार्यालयात कार्यकारी दंडाधिकारी, उपविभागीय दंडाधिकारी यांच्या नावाने अनुसूचित जातीचे प्रमाणपत्र मिळण्याकरिता अर्ज केला. सदर अर्जासोबत अलका ठाकूर हिने मनपा मराठी शाळा क्र. ३१कडे शाळा सोडल्याच्या दाखल्यावर अलका पवन ठाकूर असे नाव असताना खाडाखोड करून अलका पवन ठाकरे या नावाचा शाळा सोडल्याचा दाखला व ५० वर्षांपूर्वीचा पुरावा म्हणून अलका ठाकूर हिचे वडील पवन फुला ठाकरे या नावाचा झुंबरलाल पन्नालाल काकाणी विद्यालय मालेगाव येथील १० जुलै १९४४ या वर्षाचा शाळा सोडल्याचा खोटा बनावट दाखला तयार केला. जातीच्या दाखल्याकामी खोटे प्रतिज्ञापत्र देऊन आरोपी अलका ठाकूर हिने अलका पवन ठाकरे या नावाने भिल्ल जातीचा दाखला बेकायदेशीररीत्या व गैरहेतूने स्वत:चा फायदा करून घेण्यासाठी मिळविला व फसवणूक करून घेतली म्हणून गुन्हा दाखल करण्यात आला. अधिक तपास उपनिरीक्षक आखाडे करीत आहेत.
----------------------
रोंझाणे जंगलात तरुणाचे प्रेत
मालेगाव : तालुक्यातील रोंझाणे शिवारात गोरख बापू शेवाळे (३०) रा. रोंझाणे याचे प्रेत कुजलेल्या स्थितीत आढळून आले. पोलीसपाटील शांताराम बारकी मंडलिक यांनी तालुका पोलिसात खबर दिली. गोरख शेवाळे हा इसम २३ नोव्हेंबर रोजी रात्री घरातून बेपत्ता झाला होता. २ डिसेंबर रोजी सकाळी ७ वाजेच्या सुमारास रोंझाणे शिवारातील जंगलात मेंढपाळास मृतदेह आढळून आला. मयताच्या अंगावरील कपडे व त्याच्या भ्रमणध्वनी संचावरून त्याची ओळख पटविण्यात आली. पोलिसांनी आकस्मात मृत्यूची नोंद केली. अधिक तपास पोलीस नाईक कांबळे करीत आहेत.
------------------
गळफास घेऊन मनोरुग्णाची आत्महत्या
मालेगाव : शहरातील द्याने शिवारात धीरज धर्मराज गौतम (१९) रा. द्याने याने बाभळीच्या झाडाला गळफास घेऊन आत्महत्या केली. मयताच्या लहान भावाने रमजानपुरा पोलिसात खबर दिली. मयत धीरज गाैतम हा मनोरुग्ण होता. बुधवारी (दि. २) सकाळी पावणेआठ वाजेच्या सुमारास बाभळीच्या झाडाला गळफास घेऊन मृतावस्थेत आढळून आला. पोलिसांनी आकस्मात मृत्यूची नोंद केली. अधिक तपास हवालदार पवार करीत आहेत.
------------------