शहादा नगरपालिकेची नोव्हेंबर महिन्यात निवडणूक होणार आहे. गेल्या निवडणुकीत शहादा नगरपालिकेत एमआयएम पक्षाचे चार नगरसेवक मोठ्या मतांच्या फरकाने विजयी झाले होते. याचसोबत स्वीकृत नगरसेवकही विजयी झाला होता. पालिकेची आगामी निवडणूक डोळ्यासमोर ठेवून आता अनेक हौशेनवशे कार्यकर्ते सोयीच्या पक्षात सहभागी होऊ लागले आहेत. शहादा नगरपालिका निवडणुकीत एमआयएम पक्षाकडून विजय झालेले नगरसेवक वाहीद पिंजारी, स्वीकृत नगरसेवक ॲड. दानीश पठाण व नगरपालिका शालेय शिक्षण समितीच्या सभापती सायराबी लियाकतअली सैयद यांचे पुत्र मुजफ्फर अली सैयद यांच्यासोबत ॲड.माजित सैयद, रियाज सैयद, मोईन पटवा, मुन्शी, इमरान वायरमन, इम्रान मंडपवाले, तैसिफ बेग, काशीक शेख, अजहर खालीपा, जाकीर पठाण, रिजवान बागवान, राजा बागवान, एजाज सैयद, शकील बेलदार आदी कार्यकर्त्यांनी जलसंपदामंत्री तथा राष्ट्रवादी काँग्रेस पक्षाचे प्रदेशाध्यक्ष जयंत पाटील, माजी आमदार उदेसिंग पाडवी यांच्या उपस्थितीत राष्ट्रवादी काँग्रेस पक्षात प्रवेश केला आहे.
शहादा शहर व तालुक्यात राष्ट्रवादी काँग्रेस पक्षाचे संघटन मजबूत करण्यासाठी तसेच येणाऱ्या काळात स्थानिक स्वराज्य संस्थांच्या होणाऱ्या सर्वच निवडणुकीत हिरीरीने भाग घेऊन पक्ष कार्यकर्त्यांना विजयी करण्यासाठी प्रयत्न करणार असल्याचे मुजफ्फरअली सैयद यांनी पक्ष प्रवेशानंतर सांगितले.