शहादा बसस्थानकात पोलिसांची नेमणूक करण्याची मागणी

शहादा बसस्थानकात गेल्या अनेक दिवसांपासून पोलिसांची नेमणूक होत नसल्याने मोटारसायकलस्वार, वाहनचालक, अवैध प्रवासी वाहतूक चालक यांचा धुमाकूळ सुरू असल्याचे स्थानक प्रमुख संजय कुलकर्णी यांनी ‘लोकमत’शी बोलताना सांगितले. बसस्थानकापासून २०० मीटरच्या आत इतर वाहनांनी पार्किंग करू नये, असा नियम असताना अवैध प्रवासी वाहतूक करणारे वाहनचालक स्थानकाजवळ वाहने उभी करून व स्थानकात घुसून प्रवाशांना घेऊन जातात, तसेच प्रवाशांना घ्यायला येणारे किंवा सोडायला येणारे नातेवाईक स्थानकात जागा मिळेल तेथे वाहने उभी करीत असल्याने प्रवाशांना व बसचालकांना अडचणींचा सामना करावा लागतो. याशिवाय काही टवाळखोर मोटारसायकलस्वार विनाकारण स्थानकात मोटारसायकल फिरवतात. स्थानकात पोलीस नसल्याने प्रवाशांचे पाकीट मारणे, महिलांच्या गळ्यातील पोत ओढून घेणे, सामान चोरीस जाणे असे प्रकार घडतात. हे सर्व प्रकार रोखण्यासाठी स्थानकात कायमस्वरूपी दोन पोलिसांची नेमणूक करावी, अशी मागणी कुलकर्णी यांनी केली आहे.