नंदुरबार : जिल्ह्यातील नवापूर, धडगाव व नवापूर......... तालुक्यांत प्रधानमंत्री आवास योजनेत कोट्यवधींचा भ्रष्टाचार झाला असून, यात वर्ग एक ते चारचे अधिकारी गुंतले आहेत. या सर्व प्रकरणाचे पुरावे आपण पंतप्रधानांना देणार असून, त्यांच्याकडे सीबीआय चौकशीची मागणी करणार असल्याची माहिती खासदार डॉ. हीना गावित यांनी पत्रकार परिषदेत दिली.
खासदार डॉ. गावित म्हणाल्या, प्रधानमंत्री आवास योजनेत जवळपास चार हजार घरकुलांचा घोटाळा झाला आहे. दिशा समितीच्या बैठकीत अध्यक्ष या नात्याने याबाबत कागदपत्रांसह पुरावे आपण सादर केले. चौकशीच्या सूचना दिल्या, परंतु काहीही हालचाल होत नाही. याला कारण या भ्रष्टाचारात टॉप ते बॉटम लेव्हलचे अधिकारी गुंतले आहेत. त्यामुळे ते सर्व एकमेकांना वाचवत आहेत. आपल्याकडे असलेली कागदपत्रे आणि पुरावे आपण पंतप्रधान नरेंद्र मोदी यांना देणार असून, त्यांना सीबीआय चौकशीची विनंती करणार आहोत.
या गैरप्रकारात यादीतील नावांऐवजी दुसऱ्यांनाच घरे देणे, खोटे जीओ टॅगिंग करणे, पैसे घेऊन यादीत दुसरी गावे टाकणे असे प्रकार झाले आहेत. त्यामुळे खरे पात्र लाभार्थी त्यात वंचित राहिले असल्याचा आरोपही त्यांनी केला. यावेळी आमदार डॉ. विजयकुमार गावित उपस्थित होते.