कामठी : शासनाने नागपूर जिल्ह्यातील एकाही रेतीघाटाचा लिलाव केला नसताना कामठी तालुक्यातील कन्हान नदीवरील काही घाटांमधून रेतीचा अवैध उपसा सुरूच आहे. ती रेती तालुक्यातील येरखेडा, रनाळा, गादा व आवंढी शिवारात साठवून ठेवत नंतर विक्रीसाठी पाठविली जाते. त्यामुळे या शिवारात अवैध ‘सॅंड डम्प यार्ड’चे स्वरूप प्राप्त झाले आहे.
या रेतीतस्करीला स्थानिक नेत्यांसह खनिकर्म, महसूल व पाेलीस प्रशासनाचा वरदहस्त असल्याने शासनाचा काेट्यवधी रुपयांचा महसूल बुडत आहे.
कामठी तालुक्यात कन्हान नदीवर बिना, वारेगाव, नेरी, उनगाव, चिकना व भामेवाडा हे सहा रेतीघाट आहेत. यातील एकाही घाटाचा लिलाव करण्यात आला नाही. मात्र, या सर्व घाटांमधून रेतीचा उपसा अव्याहतपणे सुरू आहे. घाटांमधील रेती पाेकलॅण्ड मशीन किंवा जेसीबी मशीनच्या मदतीने काढली जात असून, ती ट्रक, टिप्पर, ट्रॅक्टरच्या मदतीने तालुक्यातील येरखेडा, रनाळा, गादा व आवंढी शिवारातील खाली जागेवर अथवा शेतात साठवून ठेवली जाते. त्यामुळे या भागातील काही शेतात माेठ्या प्रमाणात रेतीचे ढीग साठवून ठेवल्याचे दिसून येते.
या घाटांमधून रेतीचा उपसा करण्यात कामठी तालुक्यातील नेरी, गुमथळा तसेच माैदा तालुक्यातील काही रेतीतस्कर आघाडीवर आहेत. ही मंडळी राेज मध्यरात्रीपासून पहाटेपर्यंत रेतीचा अवैध उपसा करतात. त्यांचे स्थानिक राजकीय नेत्यांसाेबत खनिकर्म, महसूल व पाेलीस विभागातील अधिकाऱ्यांशी ‘अर्थ’पूर्ण संबंध असल्याने त्यांच्यावर कुणीही ठाेस कारवाई करीत नाही. त्यामुळे शासनाला काेट्यवधी रुपयांच्या महसुलावर पाणी साेडावे लागत आहे.
---
काेट्यवधीच्या महसुलावर पाणी
तालुक्यातील कन्हान नदीवर असलेल्या सहा रेतीघाटाचे लिलाव केल्यास राज्य शासनाला वर्षाकाठी किमान सहा ते सात काेटी रुपयांचा महसूल मिळू शकताे. घाटांचे लिलाव करण्यात न असल्याने तसेच घाटांच्या सुरक्षेकडे खनिकर्म व महसूल विभाग दुर्लक्ष करीत असल्याने शासनाला या महसुलापासून मुकावे लागत आहे.
---
रस्त्यांची दैनावस्था
रेतीच्या ‘ओव्हरलाेड’ वाहतुकीमुळे रेतीघाट परिसर व संबंधित गावालगतच्या रस्त्यांची दैनावस्था झाली आहे. स्थानिक नागरिकांनी या रेती वाहतुकीला विराेध केल्यास गुन्हेगारी प्रवृत्तीच्या रेतीतस्करांचे हस्तक दादागिरी करीत असल्याने त्यांना विराेध करण्यास कुणीही धजावत नाही.