प्रफुल्ल पटेल यांचा एव्हीएशनमध्ये तगडा संपर्क, मदत केली असती तर...; रोहित पवार यांनी व्यक्त केली खंत

Rohit Pawar on Praful Patel Ajit pawar plane Crash : अजित पवार विमान अपघाताचा तपास करण्यासाठी प्रफुल्ल पटेल यांच्या एव्हीएशनमधील संपर्काचा फायदा झाला असता, अशी खंत रोहित पवारांनी व्यक्त केली. वाचा सविस्तर बातमी.

अजित पवार यांच्या विमान अपघात प्रकरणात त्यांचे कुटुंबीय, राष्ट्रवादी पक्ष का लढत नाहीय यावर रोहित पवार यांनी रोखठोक मत मांडले. मी पवार कुटुंबातील आहे. परंतू, अजित पवार यांचे कुटुंबाने जर माझ्याकडे सगळे पुरावे मागितले तर मी सगळी कागपत्रे त्यांना देईन, परंतू लढायला हवे, असे रोहित पवार म्हणाले. तसेच राष्ट्रवादीचे ज्येष्ठ नेते प्रफुल्ल पटेल यांच्या बाबतही रोहित पवार यांनी भाष्य केले. 

रोहित पवार हे आज बारामतीमध्ये अजित पवार यांच्या घातपाती मृत्यूबाबत एफआयआर दाखल करण्याच्या मागणीसाठी पोलीस ठाण्यात होते. सुमारे दोन तास पोसिलांकडे मागणी करूनही एफआयआर दाखल केला गेला नाही. यावरून त्यांनी व्हीएसआर कंपनी आणि सरकार यावर टीका केली. 

अजित पवारांचे कुटुंब काहीच बोलत नाहीय, तुमचा दुसरा पक्ष असूनही तुम्ही लढताय यावर रोहित पवार यांनी स्पष्टीकरण दिले. जय पवार यांनी सोशल मीडियाच्या माध्यमातून सीबीआय चौकशीची मागणी केली होती. आज जर त्यांच्या कुटुंबातील कोणी आले आणि म्हणाले की आम्ही लढतो, तर मी त्यांना सर्व कागदपत्रे द्यायला तयार आहे. पण त्यांनी लढले पाहिजे, असे रोहित पवार म्हणाले. त्यांच्या पक्षाकडून आमदार अमोल मिटकरी होते. ते काल मुंबईत पोलिस ठाण्यात आले होते. त्यांच्या पक्षात प्रफुल्ल पटेल देखील आहेत. त्यांचे एव्हीएशन सेक्टरमध्ये तगडे संपर्क आहेत. त्यांनी आम्हाला हे पुरावे गोळा करण्यात मदत केली असती तर चांगलेच होते, परंतू ते झाले नाही, अशी खंत रोहित पवार यांनी व्यक्त केली.