राज्यातील २२ मनपात राज ठाकरेंच्या मनसेला भोपळा; मुंबईत दुहेरी आकडाही गाठता आला नाही

यंदाच्या निवडणुकीत मनसेकडून सर्वांना मोठ्या अपेक्षा होत्या.

Maharashtra Municipal Election Results 2026: आज महाराष्ट्रातील २९ महानगरपालिका निवडणुकांचे निकाल लागले. आतापर्यंत हाती आलेल्या निकालांनुसार, बहुतांश ठिकाणी भाजपने बहूमत मिळवले आहे. यात मुंबई मनपाची देशभरात चर्चा सुरू होती. या निवडणुकीच्या निमित्ताने दोन दशकांनंतर ठाकरे बंधू एकत्र आले होते. त्यामुळेच, उद्धवसेना आणि मनसे किती जागा जिंकणार, याकडेच सर्व राज्याचे लक्ष लागून होते.

भाजपची मुंबईत ऐतिहासिक झेप

मुंबई मनपात प्रथमच भाजपला बहुमत मिळण्याची स्पष्ट चिन्हे दिसत आहेत. तर, शिवसेना (उद्धव बाळासाहेब ठाकरे) आणि महाराष्ट्र नवनिर्माण सेना (मनसे) यांची कामगिरी अतिशय निराशाजनक ठरली आहे. मुंबई मनपात उद्धवसेना ६० च्या आसपास जागा जिंकताना दिसत आहे, तर मनसेला दुहेरी आकडाही गाठता आलेला नाही.

मनसेचा मोठ्या शहरांत दणदणीत पराभव

आपल्या राजकारणात नेहमी मराठी आणि स्थानिक विरुद्ध बाहेरचे, असा मुद्दा मांडणाऱ्या मनसेला या निवडणुकीत मोठा धक्का बसला आहे. राज्यातील 22 शहरांत मनसेला एकही जागा मिळालेली नाही. एकूणच पक्ष दहाच्या आकड्यातही पोहोचताना दिसत नाही.

शहरनिहाय मनसेची स्थिती

मुंबई (एकूण 227 जागा): 5

कल्याण-डोंबिवली (122): 4

ठाणे (131): 1

नाशिक (122): 2

नवी मुंबई: 1

अहिल्यानगर: 3

उल्हासनगर: 1

तर पुणे, संभाजीनगर, कोल्हापूर, सांगली-मिरज, मीरा-भाईंदर, वसई-विरार, भिवंडी, पनवेल, नागपूर, परभणी, जालना, पिंपरी-चिंचवड, सोलापूर, मालेगाव, जळगाव, धुळे, इचलकरंजी, नांदेड, लातूर, अमरावती, अकोला आणि चंद्रपूर येथे मनसेचा खातेही उघडलेले नाही.