दिल्लीचा 'पद्मश्री' डॉक्टर किडनी रॅकेटचा सूत्रधार; विधानसभेत धक्कादायक आरोप, शेतकरी किडनी विक्रीचे तीव्र पडसाद

नागभीड (जि. चंद्रपूर) तालुक्यातील मिथूर येथील शिवदास कुडे या शेतकऱ्याने खासगी कर्जफेडीसाठी किडनी विकल्याच्या प्रकरणाचे तीव्र पडसाद सभागृहात उमटले.

मुंबई : त्रिची (तामिळनाडू) येथील एक नामांकित हॉस्पिटल आणि देशभर किडनी प्रत्यारोपणाची शस्रक्रिया करणारे पद्मश्री विजेते दिल्लीतील एक डॉक्टर यांचा किडनी रॅकेट प्रकरणात सहभाग असल्याचा धक्कादायक आरोप काँग्रेसचे ज्येष्ठ सदस्य विजय वडेट्टीवार यांनी बुधवारी विधानसभेत केला. नागभीड (जि. चंद्रपूर) तालुक्यातील मिथूर येथील शिवदास कुडे या शेतकऱ्याने खासगी कर्जफेडीसाठी किडनी विकल्याच्या प्रकरणाचे तीव्र पडसाद सभागृहात उमटले.

वडेट्टीवार म्हणाले की, त्रिचीमधील त्या हॉस्पिटलवर कारवाई करण्यासाठी चंद्रपूरचे पोलिस गेले होते, पण त्यांना स्थानिक लोकांनी पिटाळून लावले. दिल्लीतील तो पद्मश्री डॉक्टर इतका प्रभावशाली आहे की, त्याला कोणीही हात लावू शकत नाही. शिवदास कुडे प्रकरणात आठ जणांना अटक करण्यात आली, पण ते सगळे जामिनावर सुटले, त्यांना मकोका लावण्याची मागणी दोन्ही बाजूंच्या सदस्यांनी केली. तेव्हा, कायदेशीर बाबी तपासून मकोका लावला जाईल, असे गृह राज्यमंत्री पंकज भोयर यांनी सांगितले.

आरोपींना मकोका लावण्याची मागणी

भाजपचे अतुल भातखळकर यांनी लक्षवेधी सूचना मांडताना आरोपींना मकोका लावण्याची आणि नागभीडचे प्रकरण विशेष न्यायालयात चालविण्याची मागणी केली.

नागभीडच्या शेतकऱ्याने १ लाख रुपयांचे कर्ज फेडता-फेडता ७४ लाख रुपये दिले, शेती विकली, ट्रॅक्टरही विकले. आज रस्त्यावर आलेल्या या कुटुंबाला किमान १० लाख रुपयांची मदत द्यावी, अशी मागणी वडेट्टीवार यांनी केली. काँग्रेसचे नितीन राऊत, शिंदेसेनेचे अर्जुन खोतकर, भाजपचे रणधीर सावरकर, राष्ट्रवादी (अजित पवार) चे प्रकाश साळुंके, योगेश सागर यांनी उपप्रश्न विचारत सरकारला घेरले.

सावकारी कायद्यातील नियम कठोर करणार

नागभीडच्या प्रकरणातील सहा आरोपी हे परवानाधारक सावकर नव्हते. मात्र, यानिमित्ताने परवानाधारक सावकारांसाठीचे सरकारचे नियम अधिक कडक केले जातील आणि परवाना नसलेल्या अवैध सावकारांना अटकाव करण्यासाठी कायदा अधिक कठोर केला जाईल, असे आश्वासन राज्यमंत्री भोयर यांनी दिले.

नागभीडच्या प्रकरणात सोलापुरातील एक सावकार आणि त्याच्या सहायकालाही अटक करण्यात आली होती. त्रिचीमधील ते हॉस्पिटल आणि दिल्लीतील डॉक्टरवर कारवाई करण्यासाठी सरकार पाठपुरावा सुरूच ठेवेल, असे ते म्हणाले.