ज्या रुग्णवाहिकेच्या काचेतून डोकावत बारामती ढसाढसा रडली ती रुग्णवाहिकाच...; चालक म्हणाला, माझ्यासाठी आजचा दिवस सर्वात कठीण होता

Ajit Pawar Funeral Ambulance Story : अजित पवारांच्या 'अंतिम प्रवासा'ची मन हेलावणारी गोष्ट! स्वतः दिलेली रुग्णवाहिकाच बनली पार्थिवाचे वाहन.

बारामती : राज्याच्या राजकारणातील एक झंझावाती नेतृत्व, उपमुख्यमंत्री अजित पवार यांच्या अकाली जाण्याचा चटका समर्थकांनाच नाही तर त्यांच्या विरोधकांच्याही मनाला लागून गेला. आपला असो की विरोधक असो नुकतेच मिसरूड फुटलेला असो की बालवयातील सर्वांची कामे करणारा, होत नसेल तर तिथेच नाही म्हणणारा असा हा नेता होता. ज्या गावात साधी ग्रामपंचायत ताब्यात नाही, ते गाव कधी पाहिले नाही. त्या गावातील तरुणांनी दिलेल्या एका पत्रावर गावची तहान भागविणारा असा हा जलसंपदामंत्री होता. या नेत्याने बारामतीकरांच्या सेवेसाठी जी रुग्णवाहिका दिलेली, त्याच रुग्णवाहिकेतून या नेत्याची अंत्ययात्रा निघावी अशी वेळ कोणावरही येऊ नये असा प्रसंग काल बारामतीत घडला.     

उपमुख्यमंत्री अजित पवार यांच्या अपघाती निधनाने संपूर्ण महाराष्ट्र शोकसागरात बुडाला आहे. मात्र, त्यांच्या या 'अंतिम प्रवासा'ची एक अशी हृदयद्रावक कहाणी समोर आली आहे, जी ऐकून दगडालाही पाझर फुटेल. बारामतीकरांच्या सेवेसाठी ज्या आधुनिक रुग्णवाहिकेचे लोकार्पण खुद्द अजितदादांनी सहा महिन्यांपूर्वी केले होते, दुर्दैवाने त्याच रुग्णवाहिकेतून आज त्यांचे पार्थिव अंत्यसंस्कारासाठी नेण्यात आले.

'आपलं काम इमानाने कर' - दादांचे ते शेवटचे शब्द
रुग्णवाहिका चालक नजीम काजी यांच्यासाठी आजचा दिवस आयुष्यातील सर्वात कठीण दिवस होता. सहा महिन्यांपूर्वी बारामती नगर परिषदेची रुग्णवाहिका जुनी झाल्याचे समजताच अजितदादांनी तातडीने बैठक घेऊन नवीन, हाय-टेक रुग्णवाहिका उपलब्ध करून दिली होती.

नजीम काजी यांनी रुंधलेल्या कंठाने आठवण सांगितली, "दादांनी ही रुग्णवाहिका सोपवताना माझ्या खांद्यावर हात ठेवून फक्त एकच गोष्ट सांगितली होती- 'नजीम, आपलं काम पूर्ण इमानाने कर.' ज्या गाडीतून मी लोकांचे प्राण वाचवण्याचे स्वप्न पाहिले, त्याच गाडीत मला आज माझ्या लाडक्या नेत्याला अखेरच्या प्रवासाला न्यावे लागले, हे माझे सर्वात मोठे दुर्दैव आहे."