धक्कादायक! 'बॉडी मसाज'च्या नावाखाली अंगावर नाचला; लातूरमध्ये तरुणाचा मणका सरकला, एकावर गुन्हा दाखल

Udgir Body Massage Crime लातूरमध्ये मसाजच्या नावाखाली अंगावर नाचला! तरुणाचा मणका मोडला; उदगीरमध्ये गुन्हा दाखल

उदगीर (जि. लातूर): मसाज करून शरीराचा थकवा दूर करण्याच्या नादात एका तरुणाला गंभीर दुखापत झाल्याची संतापजनक घटना उदगीरमध्ये घडली आहे. मसाज करणाऱ्या व्यक्तीने अंगावर जोरजोरात नाचल्यामुळे फिर्यादीच्या पाठीचा मणका सरकला असून मणक्यातील गादी बाजूला सरकल्याने नसेवर दबाव आला आहे. याप्रकरणी उदगीर ग्रामीण पोलीस ठाण्यात एका भोंदू मसाज करणाऱ्यावर गुन्हा दाखल करण्यात आला आहे.

बीदर जिल्ह्यातील औराद येथील गौरव कल्याणराव देशमुख हे १ डिसेंबर २०२५ रोजी मसाज करण्यासाठी उदगीर जवळील मादलापूर येथे सचिन मारोती दारनुले - देवणीकर याच्याकडे गेले होते. आरोपीने मसाजसाठी दीड हजार रुपये फी घेतली आणि गौरवला जमिनीवर पालथे झोपवले. मसाज सुरू केल्यानंतर आरोपीने चक्क गौरवच्या पाठीवर आणि कमरेवर उभे राहून जोरजोरात नाचण्यास सुरुवात केली. गौरवने वेदनेमुळे ओरडत "सावकाश करा, त्रास होत आहे" असे वारंवार विनवले. मात्र, "बॉडी मसाज असाच असतो" असे म्हणत आरोपीने पायाचे गुडघे, कोपर आणि मुठीने पाठीवर जोरात प्रहार केले.

गंभीर वैद्यकीय दुखापत
या अघोरी प्रकारामुळे गौरवच्या कमरेला आणि मणक्याला गंभीर जखम झाली. वैद्यकीय तपासणीत त्याच्या मणक्याची गादी बाजूला सरकून नस दबली गेल्याचे निष्पन्न झाले आहे. या प्रकारामुळे गौरवचे चालणे-फिरणे कठीण झाले असून अखेर सोमवारी सायंकाळी त्याने पोलीस ठाण्यात धाव घेऊन तक्रार दिली. पोलिसांनी सचिन देवणीकर विरुद्ध गुन्हा दाखल केला असून पोलीस हवालदार तुडमे या प्रकरणाचा पुढील तपास करत आहेत.