शिवराज मोटेगावकरच्या अटकेनंतर ‘सीबीआय’चा महाराष्ट्रातील मुक्काम वाढला, तपासणी सत्र सुरूच!

Shivraj Motegaonkar Latest News: पुण्यात चौकशीसाठी हजर राहिलेल्या प्रा. शिवराज मोटेगावकरची अटक झाल्याची बातमी शहरात आल्यानंतर कोचिंग क्लासेस परिसरात खळबळ उडाली.

लातूर : नीट पेपरफुटी प्रकरणानंतर सीबीआयचे पथक तिसऱ्यांदा सोमवारी लातूर शहरात दाखल झाले. आरसीसी क्लासेसची दिवसभर झाडाझडती घेतल्यानंतरही पथकाचा लातुरातच मुक्काम राहणार असून, तो किमान पुढचे चार-पाच दिवस असल्याचे कळते.

पुण्यात चौकशीसाठी हजर राहिलेल्या प्रा. शिवराज मोटेगावकरची अटक झाल्याची बातमी शहरात आल्यानंतर कोचिंग क्लासेस परिसरात खळबळ उडाली. त्या अटकेनंतर पेपर आणखी कोणाला मिळाला अथवा पेपरफुटीचे इतर धागेदोरे आहेत का? याचा शोध सीबीआयचे पथक घेत असल्याचे समजते. कागदपत्रे, डिजिटल पुरावे तसेच सराव प्रश्नपत्रिका अशा सर्व संदर्भाने सीबीआय शोधमोहीम राबवत आहे.

पोलिस तपास अन् सीबीआयची दिशा...

सीबीआयने देशभरामध्ये विविध ठिकाणी आरोपींना ताब्यात घेतले. पेपर फोडणारे, पेपर सेटर, नाशिक कनेक्शनचा धागा समोर आल्यानंतर पहिल्या टप्प्यात त्यांच्या मुसक्या आवळल्या. त्यानंतर पैसे देऊन पेपर मिळवणाऱ्या दुसऱ्या कडीतील आरोपींची शोधमोहीम घेतली. 

लातुरातील तक्रारीच्या संदर्भाने पोलिसांनी तपास करून पुढील कारवाईसाठी सीबीआयशी समन्वय केला. स्थानिक जबाबामधून मिळालेली माहिती आणि पेपर फोडणारे, पेपर सेटर अशी वरून लागणारी लिंक जोडल्याने तपास गतीने पुढे गेला. आता आणखी कोणाचा व कसा संबंध आहे, याचा शोध घेतला जात आहे.

व्हिडीओ आणि पीडीएफ प्रश्नसंच...

आरसीसी स्टडी मटेरियलमधील प्रश्न परीक्षेत कसे आले, याचा विद्यार्थ्यांसमवेत केलेला मोटेगावकरचा व्हिडीओ आणि हस्तलिखित पीडीएफचा प्रश्नसंच हा मुद्दा अटकेनंतर दिवसभर चर्चेत होता. त्यांनी घेतलेल्या मॉक टेस्टमधील प्रश्न आणि ३ मे रोजीच्या परीक्षेतील ४२ प्रश्न जुळले. 

त्यासंदर्भात स्थानिक पोलिसांना आणि सीबीआयच्या दिल्ली कार्यालयाला तक्रार झाली होती. आता त्यास मिळालेले प्रश्न पुढे कोणापर्यंत पोहोचले, याचा मात्र उलगडा झाला नसल्याने तपास त्या दिशेने जाईल, असे सूत्रांनी सांगितले.