मुरगूड नगरपरिषदेची विशेष सर्वसाधारण सभा व्हिडिओ कॉन्फरन्सद्वारे पार पडली. सभेच्या अध्यक्षस्थानी नगराध्यक्ष राजेखान जमादार होते.
ग्रामविकासमंत्री हसन मुश्रीफ यांच्यावर भ्रष्टाचाराचे बेछूट आरोप करणाऱ्या व बदनाम करू पाहणाऱ्या किरीट सोमय्या यांचा या सभेत चांगलाच समाचार घेण्यात आला. स्टंटबाजी करण्यासाठी आणि सवंग लोकप्रियतेसाठी मुरगूड शहरात येण्याचा प्रयत्न सोमय्यांनी अजिबात करू नये, असे सांगून नगराध्यक्ष जमादार यांनी तीव्र शब्दांत निषेध करुन सोमय्यांना शहरप्रवेश कायमचा बंद करण्याचा निर्णय घेत असल्याचे सांगितले. चर्चेत ग्रामीण रुग्णालयाची जुनी ऐतिहासिक व पुरातन इमारत असून ती सव्वाशे वर्षांपूर्वी छत्रपती शाहू महाराजांनी कल्पकतेने या इमारतीचे बांधकाम केले आहे. या इमारतीचे संवर्धन व्हावे यासाठी शासनाने त्याचा हेरिटेजमध्ये समावेश करून घोषणा करावी, असा ठराव सर्वानुमते मांडण्यात आला. त्यालाही सर्वांनी मंजुरी दिली.
पाच वर्षांच्या काळात मुरगूड शहरात किती कोटींची विकासकामे झाली? त्यामध्ये कामे किती पूर्ण? व किती अपूर्ण आहेत याची सभागृहासमोर माहिती सादर करण्याची मागणी नगरसेवक सुहास खराडे यांनी केली. शहरातील धोकादायक इमारती काढून घेण्याचा व फायर बॉल खरेदीचा मुद्दा नगरसेवक नामदेव मेंडके व जयसिंग भोसले यांनी उपस्थित केला.
पालिकेची सार्वत्रिक निवडणूक लवकरच होणार असल्याने त्यासाठी १८ ते २० लाख रुपये खर्च अपेक्षित आहे. या अपेक्षित खर्चासाठी आर्थिक तरतूद करण्यात आली असल्याने खर्चास सभागृहाने मंजुरी दिली. या सभेत मुख्याधिकारी हेमंत निकम, उपनगराध्यक्षा रंजना मंडलिक, नामदेव मेंडके,जयसिंग भोसले, सुहास खराडे,संदीप कलकूटकी,राहुल वंडकर,विशाल सूर्यवंशी,मारुती कांबळे,रवी परीट,बाजीराव गोधडे,रेखाताई मांगले,सुप्रिया भाट, अनुराधा राऊत,रुपाली सनगर,प्रतिभा सूर्यवंशी,वर्षाराणी मेंडके,संगीता चौगले आदींनी चर्चेत सहभाग घेतला. अहवालवाचन स्नेहल पाटील यांनी केले.