यात्रेच्या सोमवारी मुख्य दिवशी पहाटे पाच वाजता शासकीय महापूजा पन्हाळाचे तहसीलदार रमेश शेंडगे यांच्या हस्ते झाली. यात्रेनिमित्त दख्खनचा राजा श्री जोतिबा देवाची राजेशाही थाटातील सालंकृत महापूजा बांधण्यात आली. ही पूजा प्रवीण कापरे, कृष्णात दादर्णे, प्रकाश सांगळे यांनी बांधली.
दहा वाजता धुपारती सोहळा झाला
चैत्र यात्रेत गुलाल-खोबरे, बंदी नाणी यांची पालखीवर होणारी उधळण, चाळीस फूट उंचीच्या सासनकाठ्या, रंगीबेरंगी कपड्यांनी सजविलेल्या सासनकाठ्या, काही काठ्यांना नोटांच्या माळा, फुलांच्या माळा असतात. हलगी पिपाणी, तुतारी, सनईच्या तालावर काठ्या विशिष्ट पद्धतीने नाचविले जाणारे दृष्य, भर उन्हात गुलालात चिंब होऊन नाचणारा तरुण वर्ग ‘सर्वांच्या मुखात जोतिबाच्या नावानं चांगभलऽऽचा अखंड गजर यंदाही पाहायला आणि ऐकायला मिळाला नाही. '
दुपारी १२ वाजता निघणाऱ्या सासनकाठीच्या मिरवणुका यंदाही निघाल्या नाहीत.
मानाच्या १८ सासनकाठ्या सहभागी होतात. मान नसलेल्या ५७ आणि इतर २९ अशा एकूण ९६ सासनकाठ्या सहभागी असतात. या मिरवणुकीमध्ये २० फुटांपासून ते ७० ते ८० फुटांच्या उंचच उंच सासनकाठ्या सहभागी असतात. हलगी पिपाणीच्या तालावर या सासनकाठ्या भाविक नाचवीत असतात. सलग दुसऱ्या वर्षीही ही मिरवणूक झाली नाही. सासनकाठी मार्गावर शुकशुकाट होता. कडक बंदोबस्त ठेवला होता. जोतिबा गावातील सर्व गल्ल्या बंदिस्त ठेवल्या होत्या. सायंकाळी सहा वाजता तोफेच्या सलामीने जोतिबा मंदिरातून मोजक्याच पुजाऱ्यांसमवेत यमाई मंदिराकडे पालखी मार्गस्थ झाली. सायंकाळी साडेसहा वाजता यमाई मंदिरात यमाईदेवी व जमदग्नी यांच्या विवाह सोहळ्याचा धार्मिक विधी होईल. श्री जोतिबा मंदिरात येऊन तोफेच्या सलामीने रात्री दहा वाजता पालखी सोहळ्याची सांगता झाली.
.............
गृहराज्यमंत्री देसाई यांनी घेतले दर्शन
दरम्यान, दुपारी गृहराज्यमंत्री शंभूराज देसाई यांनी श्री जोतिबाचे दर्शन मंदिराच्या बाहेरून घेतले. प्रसारमाध्यम प्रतिनिधींना जोतिबा डोंगरावर आणि जोतिबा मंदिरात प्रवेश करण्यास मनाई केली होती. पश्चिम देवस्थान समितीमार्फत जोतिबा दर्शन पालखी सोहळ्याचे थेट प्रसारणासाठी ऑनलाईनची सुविधा भाविकांना उपलब्ध करून दिली होती.
फोटो जोतिबा१,२,३
चैत्र पौर्णिमेनिमित्त दख्खनचा राजा श्री जोतिबा देवाची बांधण्यात आलेली राजेशाही थाटातील सालंकृत बैठी महापूजा.
२ ) कडक लॉकडाऊनमुळे मंदिर परिसर आणि सासनकाठी मार्गावर भाविकांविना शुकशुकाट असा दिसत होता.