लोकमत न्यूज नेटवर्क
कोपार्डे : शिक्षकांना शाळाबाह्य विद्यार्थी शोधण्याचे शिक्षण विभागाकडून मिळालेल्या आदेशाने शिक्षक गल्ली-गल्लीत शाळाबाह्य विद्यार्थ्यांना शोधण्यासाठी शाळेच्या वेळेत फिरत आहेत. यामुळे शाळेत असणाऱ्या विद्यार्थ्यांना शिकविण्यासाठी शिक्षकच जागेवर नसल्याने अनेक विद्यार्थ्यांचे शैक्षणिक नुकसान होत आहे, याबाबत पालकांतून तीव्र नाराजी व्यक्त होत आहे.
कोरोना महामारीच्या काळात गेली सात ते आठ महिने शाळांचे दरवाजे बंद होते. यावर्षीचे शैक्षणिक वर्षे सध्या शासनाने सुरू केले आहे. तेही प्राथमिक, माध्यमिक, उच्च माध्यमिक व महाविद्यालय यांना सक्त नियम पाळून यावर्षीचा दिलेला शैक्षणिक अभ्यासक्रम पूर्ण करावयाचा आहे. प्राथमिकसाठी सकाळी ११ ते २ शाळा भरविण्यात येत आहेत.
पण, शिक्षण विभागाकडून शाळाबाह्य विद्यार्थ्यांचा अहवाल देण्यासाठी शिक्षकांना आदेश दिले आहेत. १० एप्रिलपर्यंत हा शाळाबाह्य विद्यार्थ्यांचा अहवाल सादर करायचा आहे. म्हणून शिक्षक गावातील गल्ली-गल्लीत व वीटभट्टी व ऊसतोड मजुरांच्या झोपड्या शोधत आहेत.
. हे काम शिक्षक शाळेच्या वेळेतच करीत असल्याने शाळेत असणारी २०० ते ४०० विद्यार्थी वर्गाऐवजी मैदानावर दिसत आहेत. याबाबत पालकांच्या तक्रारी शिक्षण व्यवस्थापन समितीकडे गेल्याने काही गावात शाळेत जाऊन याबाबत जाब विचारला जात आहे. पण, अधिकाऱ्यांचे आदेश असल्याने आम्हाला ते करावे लागत असल्याचे शिक्षकांनी सांगितल्याने पालकांतून तीव्र संताप व्यक्त होत आहे.
.
प्रतिक्रिया -
१० एप्रिलपर्यंत शाळाबाह्य मुलांचे सर्वेक्षण करण्याचे आदेश शासनाचे आहेत. हा एक राष्ट्रीय कार्यक्रम आहे आणि हे काम कोणत्या वेळेत करायचे याबाबत बंधन नसल्याने शिक्षक शाळेच्या वेळेत हे काम करतात यात काही गैर नाही अशाप्रकारे गटशिक्षणाधिकारी यांनी त्याचे समर्थन केले.
एस. के. यादव (गटशिक्षणाधिकारी करवीर )--
आता कुठे शाळा सुरू झाल्या आहेत. वर्ष संपत आले आहे. दोन शिक्षक पदे रिक्त आहेत, तर एखादा शिक्षक रजेवर गेला तर अडचण. चार शाळाबाह्य विद्यार्थी शोधण्यासाठी शिक्षक गल्लोगल्ली फिरत आहेत. गेल्या दहा दिवसांपासून शाळेत असणारे ४०० विद्यार्थी मैदानावर खेळताना दिसत आहेत. याबाबत मुख्याध्यापकाकडे तक्रार केली तर वरिष्ठांनी आदेश दिल्याचे सांगितले जात आहे. शाळेच्या वेळेनंतर हे काम शिक्षकांनी करावे व शैक्षणिक अभ्यासक्रम पूर्ण करावा. शाळाबाह्य मुलांचे सर्वेक्षण सुट्टीत करावे.
कृष्णात पाटील (शाळा व्यवस्थापन समिती सदस्य, वाकरे. )