तत्कालीन ग्रामसेवकावर ठपका

अनधिकृत बांधकाम प्रकरण : खातेनिहाय चौकशी अहवालात स्पष्ट; पुढील कारवाईकडे लक्ष

कोल्हापूर : उचगाव (ता. करवीर) ग्रामपंचायतीमधील तत्कालीन ग्रामसेवक एकनाथ सदाशिव सूर्यवंशी यांची सहायक आयुक्तांनी खातेनिहाय चौकशी केली. चौकशीत अनियमित, नियमबाह्य कामकाज, अनधिकृत बांधकामास परवानगी देऊन कर्तव्यात कसूर केल्याचा ठपका सूर्यवंशी यांच्यावर ठेवण्यात आला आहे. त्यामुळे सूर्यवंशी यांच्यावर जिल्हा परिषदेचे मुख्य कार्यकारी अधिकारी अविनाश सुभेदार काय कारवाई करणार याकडे सर्वांचे लक्ष लागले आहे.
सन २०१० मध्ये सूर्यवंशी ग्रामसेवक म्हणून कार्यरत होते. उचगाव गावास इचलकरंजी प्रादेशिक असंविधानिक विकास योजना लागू आहे. या योजनेचे नियोजन प्राधिकारी हे जिल्हाधिकारी आहेत.
त्यामुळे गावठाण हद्दीबाहेर इमारत बांधकाम करण्यापूर्वी जिल्हाधिकारी यांची परवानगी घेणे बंधनकारक आहे. तथापि, उचगाव येथील रि. स. नंबर ८४/८७, ९१, ९२ ते १०३, १२४, १४४, १४६ ते १४८ या सर्व उचगाव मिळकती महानगरपालिकेच्या हद्दीमध्ये सामाविष्ट आहेत. आरक्षण क्रमांक २५७ कचरा टेपोसाठी व आरक्षण क्रमांक १५८ ट्रक टर्मिनस विकास विभागामध्ये दर्शविला आहे.
दरम्यान, सूर्यवंशी यांनी आपल्या कालावधीत रि. स. नंबर ८४/८७, ९१, ९२ ते ९६, १०० ते १०३, १२४, १४४, १४६ ते १४८ मध्ये बांधकामास नियमबाह्य परवानगी दिली. कागदपत्रांची खातरजमा न करता अनधिकृत बांधकामांना परवानगी दिली आहे. नियमापेक्षा जादा मजले बांधकामसही परवानगी दिली आहे. या प्रकरणात कर्तव्यात कसूर केली आहे.
दरम्यान, अतिक्रमणाची तक्रार माजी नगरसेवक व राष्ट्रवादी काँग्रेस पक्षाचे जिल्हा उपाध्यक्ष अनिल कदम यांनी केली होती.
१८ जून २०१२ रोजी बेकायदेशीर अतिक्रमण करून बांधकाम केलेल्यांवर कारवाई करावी, अशी शिफारस नगरविकास विभागाच्या वरिष्ठ अधिकाऱ्यांनी केली होती.
मात्र, तत्कालीन उपमुख्य कार्यकारी अधिकारी यांनी तत्कालीन गटविकास अधिकारी, ग्रामसेवक यांना संगनमताने अभय दिले. या प्रकरणात दोषी ग्रामसेवक तलाठी यांच्यावर कारवाई करावी, अशीही तक्रार कदम यांनी केली आहे. या प्रकरणाकडे संपूर्ण जिल्ह्याचे लक्ष लागले आहे. (प्रतिनिधी)