विरोधी गटाच्या हालचालींकडे लक्ष

आजरा तालुक्यातील राजकारण : सतेज पाटील यांची भूमिक महत्त्वपूर्ण

ज्योतिप्रसाद सावंत - आजरा -कोल्हापूर जिल्हा दूध उत्पादक संघाच्या पंचवार्षिक निवडणुकीच्या हालचाली वेगावल्या आहेत. विरोधी आघाडीकडून कोण? हा प्रश्न सध्यातरी अनुत्तरित असला, तरी राष्ट्रवादीकडून दंड थोपटल्यास रंगत येईल.
आजरा तालुक्यातील २७५ संस्थांपैकी २१५ संस्था मतदानास पात्र आहेत. गेली पाच वर्षे आपटेंची पेरणी सुरू आहे. जिल्हापातळीवरील राजकारणात राष्ट्रवादीने विद्यमानांच्या विरोधात दंड थोटपले, तर राष्ट्रवादीकडून वसंतराव धुरे अथवा उदय पवार या आजरा साखर कारखान्याच्या माजी अध्यक्षांपैकी एकाचे नाव पुढे येऊ शकते. माजी गृहराज्यमंत्री सतेज ऊर्फ बंटी पाटील यांनी आक्रमक पवित्रा घेतल्यास कै. केदारी रेडेकर संस्था समूहाच्या अध्यक्षा अंजनाताई रेडेकर यांचे नाव पुढे येऊ शकते. कै. शिवपुत्रअण्णा शेणगावे, वसंतराव धुरे, उदय पवार यांनी आपटे यांच्या विरोधात यापूर्वीही दंड थोपटले होते.
गत निवडणुकीत उदय पवार यांनी आपटेंशी लढत देण्याचा प्रयत्न केला; परंतु यामध्ये आपटे यांनी एकतर्फी विजय मिळविला. बदलत्या संदर्भानुसार कै. वसंतराव देसाई, राजारामबापू देसाई, बळिराम देसाई, काशिनाथअण्णा चराटी, बापूसाहेब धुरे, मुकुंदराव आपटे यांनी रवींद्र आपटे यांची पाठराखण केली. सद्य:स्थितीत वसंतराव धुरे, उदय पवार, अंजनाताई रेडेकर, विष्णुपंत केसरकर, अशोक चराटी यांच्या स्वत:च्या दूध संस्था आहेत. उमेश आपटे हे सतेज पाटील यांना मानणारे असले, तरी राजकीय गुरू म्हणून रवींद्र आपटे यांच्या शब्दाबाहेर जाणारे नाहीत. जयवंतराव शिंपी यांनी गत निवडणुकीत आपटेंबरोबर राहण्याची घेतलेली भूमिका सर्वश्रृत आहे.
आपटे यांनी ‘गोकुळ’ समोर ठेवूनच इतर राजकीय संस्थांचे राजकारण केले. इतर संस्थांमध्ये फारशी कधी ढवळाढवळ केली नाही. ‘रिमोट’ हातात ठेवून हालचाली केल्या, पण गोकुळ व्यतिरिक्त इतर संस्थांत ते थेट उमेदवार म्हणून कधीच दिसले नाहीत. निवडणुकीतील थेट सात वर्षांचे पडलेले अंतरही त्यांना फायद्याचे ठरले आहे.