बेळगाव : दिल्लीमध्ये शेतकऱ्यांच्या आंदोलनाला सरकारने कोणताही प्रतिसाद दिला नाही. भाजप सरकार हे शेतकऱ्यांच्या विरोधातील सरकार असून या सरकारला पराभूत करणे हेच आपले उद्दिष्ट असल्याचे विधान माजी केंद्रीय मंत्री बाबागौडा पाटील यांनी केले आहे. बेळगाव लोकसभा पोटनिवडणुकीच्या पार्श्वभूमीवर पत्रकार परिषदेत त्यांनी भाजप सरकारवर जोरदार टीका केली. केंद्रात असलेले भाजपचे सरकार हे शेतकरी, विद्यार्थी, कामगार, महिला यांच्या विरोधातील जनविरोधी सरकार आहे. हे सरकार सत्तेवर आल्यापासून जनता सर्वनाशाकडे मार्गक्रमण करत असल्याचा आरोप बाबागौडा पाटील यांनी केला. या जनविरोधी सरकारला आगामी निवडणुकीत पराभूत करणे आणि शेतकऱ्यांची शक्ती दाखवून देणे हे आपले उद्दिष्ट असल्याचे बाबागौडा पाटील यांनी सांगितले.
सततची महागाई, जीवनावश्यक वस्तूंची दरवाढ, इंधन वाढ, शेतकऱ्यांच्या विरोधातील कायदे अमलात आणणे या सर्वांमुळे हे सरकार देश चालविण्यात सपशेल हरले आहे. यावेळी कामगार नेते, शेतकरी नेते आणि कार्यकर्ते उपस्थित होते.