लोकमत न्यूज नेटवर्क
जळगाव : सालार नगर, मिल्लत नगर, अक्सा नगर, मास्टर कॉलनी या परिसरासाठी अंडरपास नसल्याने मागील वर्षापासून वारंवार मागणी करूनही त्याकडे दुर्लक्ष केले जात असल्याने या विरोधात विविध संघटना, राजकीय पक्षांच्या मंडळींनी शुक्रवार ४ डिसेंबर रोजी महामार्ग प्राधिकरणाच्या कार्यालयात धडक दिली. १० दिवसात प्रस्ताव न गेल्यास महामार्ग कार्यालयात ठिय्या आंदोलन करण्यात येईल, असा इशाराही या वेळी देण्यात आला. वेळ देऊनही प्रकल्प संचालक भेटत नसल्याने या वेळी संताप व्यक्त केला.
शहरातून जाणाऱ्या महामार्ग चौपदरीकरणाच्या कामात सालार नगर, मिल्लत नगर, अक्सा नगर, मास्टर कॉलनी हा परिसर सुमारे तीस ते चाळीस हजार लोकवस्तीचा आहे. या महामार्गवर कोणत्याही प्रकारचा अंडरपास नसल्याने मागील वर्षापासून परिसरातील नगरसेवक व नागरिक राष्ट्रीय राजमार्ग प्राधिकरणच्या अधिकाऱ्यांना भेटून तसेच खासदार, आमदार, महापौर व सामाजिक संघटनेचे विविध पदाधिकारी भेटून अंडर पासची मागणी करीत आहे. असे असताना अद्याप प्राधिकरणाने अधिकृतरित्या कोणतीही कारवाई केली नसल्याने शुक्रवार ४ डिसेंबर रोजी सामाजिक कार्यकर्ते फारुक शेख यांनी जळगाव शहरातील सर्व राजकीय पक्ष प्रमुख व शाळेचे प्रमुख, राष्ट्रवादीचे अल्पसंख्यांक विभागाचे जिल्हाध्यक्ष मझर खान, काँग्रेसचे शहर प्रमुख नदीम काझी, मनसेचे अध्यक्ष जमील देशपांडे, शिवसेना महानगराध्यक्ष झाकीर पठाण, मार्क्सवादीचे अकिल पठाण, मिल्लत हायस्कुलचे मुख्याध्यापक मुश्ताक मिर्झा, शाह बिरादरी शाळेचे प्रमुख जाहिद शाह,अक्साबॉईज फाउंडेशनचे ॲड. आमिर शेख यांच्या सह जाऊन महामार्ग प्राधिकरणाच्या कार्यालयात धडक दिली.
अधिकाऱ्यांशी चर्चा
शिष्टमंडळाने उपस्थित अधिकारी वर्गास आपल्या मागण्या व महामार्गाचे म्हणणे लेखी स्वरूपात मागितले असता कार्यालयात उपस्थित उपव्यवस्थापक पंकज प्रसाद, अभियंता विश्वजित बागळकर व सी. एस. गायकवाड, सुभाष राऊत यांनी शिष्टमंडळाशी चर्चा करून प्रकल्प संचालक चंद्रकांत सिन्हा हे जळगावी कार्यालयात आल्यावर योग्य तो लेखी अहवाल देण्यात येईल, अशी ग्वाही दिली. सिन्हा हे १ ते ५ डिसेंबर पर्यंत नागपूर कार्यालयात कार्यालयीन कामासाठी गेले आहे, असे लेखी पत्र त्यांनी शिष्टमंडळास दिले.
प्रकल्प संचालक वेळ देऊनही भेटत नसल्याने कार्यालयातच मुक्कामाचा इशारा
प्रकल्प संचालक चंद्रकांत सिन्हा यांची अधिकृत भेटीची वेळ घेतली असतांना गुरुवारची भेट सुद्धा रद्द केली व त्यांनीच दिलेली शुक्रवारच्या भेटीची वेळ देऊन सुद्धा ते जळगावी पोहोचू शकले नाही. त्यामुळे शिष्टमंडळाने कार्यालयातच मुक्काम करण्याचा निर्णय घेतला. परंतु चंद्रकांत सिन्हा यांनी भ्रमणध्वनीद्वारे दिलगिरी व्यक्त करून कार्यालयीन कामानिमित्त नागपूर येथेच असल्याचे स्पष्ट केल्याने शिष्टमंडळाने ते मान्य केले.
फोटो कॅपशन
महामार्ग प्राधीकरणच्या अधिकाऱ्यांना निवेदन देताना फारूक शेख,जमील देशपांडे, नदीम काझी, मझर खान, झाकीर पठाण,मुश्ताक मिर्झा,जाहिद शाह,ॲड. आमिर शेख व नबील शेख.