अंबड येथे शोभायात्रा
अंबड : अयोध्या येथील श्री राम मंदिर निर्माण निधी संकलनासाठी अंबड शहरात शोभायात्रा काढण्यात आली. शहरातील छत्रपती शिवाजी महाराज चौकातून या शोभायात्रेची सुरुवात करण्यात आली. यावेळी आत्माराम शास्त्री महाराज, रा.स्व. संघाचे तालुका संघचालक गुलाब राठोड, सुरेश महाराज शेळके, पावसे महाराज, सीताराम जाधव, अंकुश जाधव, द्वारकादास जाधव, डॉ. राजेंद्र भाला, देवीदास कुचे यांच्यासह नागरिकांची उपस्थिती होती.
पाणीटंचाईचा प्रश्न सोडविण्याची मागणी
बदनापूर : शहरातील हुसेननगर व परिसरात गत काही दिवसांपासून पाण्याची टंचाई निर्माण झाली आहे. पाण्याअभावी नागरिकांची मोठी गैरसोय होत आहे. सतत निर्माण होणारा पाणी प्रश्न सोडविण्याकडे नगरपंचायत प्रशासनाचे दुर्लक्ष होत असल्याने संताप व्यक्त होत आहे. तरी पदाधिकारी, अधिकाऱ्यांनी लक्ष देऊन पाण्याचा पुरवठा सुरळीत करावा, अशी मागणी होत आहे.
गरजू ५१ नागरिकांना चादरींचे वाटप
जालना : अखिल भारतीय छावा संघटनेचे संपर्कप्रमुख विलास वाघमारे यांच्या वतीने शहरातील गरजू ५१ नागरिकांना चादरींचे वाटप करण्यात आले. यावेळी लहुजी शक्तीसेनेचे मराठवाडा प्रदेशाध्यक्ष सचिन क्षीरसागर, अखिल भारतीय छावा संघटनेचे जिल्हा सरचिटणीस सुदर्शन शिंदे, तालुकाध्यक्ष रमेश कव्हळे, नंदा पवार, गणेश चांदोडे यांच्यासह पदाधिकारी, सदस्यांची उपस्थिती होती.