पाकिस्तानींमुळे लंडनमधील प्रसिद्ध भारतीय रेस्टॉरंट बंद करण्याची आली वेळ; मालकाने व्यक्त केली व्यथा

Rangrez Hammersmith closing news: लंडनमधील प्रसिद्ध 'रंगरेझ' रेस्तरां १६ वर्षांनंतर बंद होणार आहे. मालक हरमन सिंह कपूर यांनी पाकिस्तानी लोकां कडून होणारा छळ आणि खोट्या रिव्ह्यूमुळे हा निर्णय घेतल्याचे सांगितले.

लंडन : लंडनमध्ये गेल्या १६ वर्षांपासून अस्सल भारतीय चवीचे पदार्थ देणारे 'रंगरेझ' हे रेस्टॉरंट आता कायमचे बंद होणार आहे. रेस्टॉरंटचे मालक हरमन सिंह कपूर यांनी अत्यंत जड अंतःकरणाने हा निर्णय घेतला असून, यासाठी त्यांनी पाकिस्तानी लोकांकडून होणारा सातत्यपूर्ण छळ आणि 'ऑनलाइन हॅरासमेंट' कारणीभूत असल्याचे म्हटले आहे.

हरमन सिंह कपूर यांनी सोशल मीडिया प्लॅटफॉर्म 'X' वर एक पोस्ट शेअर करत ही माहिती दिली. त्यांनी आरोप केला की, गेल्या काही काळापासून काही विशिष्ट पाकिस्तानी गटांकडून त्यांना लक्ष्य केले जात आहे. त्यांच्या रेस्टॉरंटच्या नावाने इंटरनेटवर खोटे रिव्ह्यू देणे, त्यांना धमकावणे आणि रेस्तरांमध्ये येऊन गोंधळ घालणे अशा प्रकारांमुळे व्यवसायावर मोठा परिणाम झाला आहे.

कपूर यांनी आपल्या पोस्टमध्ये लंडनच्या 'मेट्रोपॉलिटन पोलीस' दलावरही ताशेरे ओढले आहेत. सततच्या हल्ल्यांनंतर आणि त्रासानंतरही स्थानिक प्रशासनाकडून किंवा पोलिसांकडून कोणतीही ठोस मदत मिळाली नाही, ज्यामुळे सुरक्षितपणे व्यवसाय करणे आता अशक्य झाले असल्याचे त्यांनी नमूद केले. वाढत्या खर्चासोबतच या मानसिक त्रासामुळे त्यांना हैमरस्मिथ येथील हे लोकप्रिय हॉटेल पुढच्या महिन्यापासून बंद करावे लागत आहे.

सोशल मीडियावर संतप्त प्रतिक्रिया
१६ वर्षांच्या या प्रवासात 'रंगरेझ'ने अनेक खवय्यांची मने जिंकली होती. हे रेस्तरां बंद होत असल्याचे ऐकून अनेक भारतीयांनी आणि स्थानिक ग्राहकांनी दुःख व्यक्त केले आहे. तसेच, परदेशात भारतीय व्यावसायिकांना अशा प्रकारे लक्ष्य केले जाणे चिंताजनक असल्याची प्रतिक्रिया नेटकरी देत आहेत.