Mansarovar Yatra: "लिपुलेख आमचाच!" भारताच्या मानसरोवर यात्रेला नेपाळचा विरोध; चीनवरही निशाणा

लिपुलेख हा आपलाच भाग असल्याचा दावा नेपाळने पुन्हा एकदा केला आहे. ही यात्रा यावर्षी जून ते ऑगस्ट या कालावधीत होत आहे... 

भारत सरकारने उत्तराखंडमधील पिथौरागढ येथील लिपुलेख खिंडमार्गे कैलास मानसरोवर यात्रेची घोषणा केली आहे. यावर नेपाळणे आक्षेप घेतला आहे. या यात्रेसाठी भारत आणि चीन यांच्यात होत असलेल्या सहकार्यामुळे नेपाळने दोन्ही देशांकडे आपला विरोध नोंदवला. लिपुलेख हा आपलाच भाग असल्याचा दावा नेपाळने पुन्हा एकदा केला आहे. महत्वाचे म्हणजे, ही यात्रा यावर्षी जून ते ऑगस्ट या कालावधीत होत आहे. 

नेपाळचा दावा आणि परराष्ट्र मंत्रालयाची भूमिका 
यासंदर्भात नेपाळच्या परराष्ट्र मंत्रालयाने रविवारी प्रतिक्रिया दिली. मंत्रालयाने म्हटले आहे की, १८१६ च्या सुगौली संधीनुसार महाकाली नदीच्या पूर्वेकडील लिम्पियाधुरा, लिपुलेख आणि कालापानी हे नेपाळचे अविभाज्य भाग आहेत. बालेन शाह यांच्या सरकारने केवळ यात्रेलाच नाही, तर भारताने या मार्गाने चीनशी व्यापार सुरू करण्याच्या निर्णयावरही तीव्र नाराजी व्यक्त केली. 

कोणत्याही परकीय देशाचा हस्तक्षेप खपवून घेतला जाणार नाही -
याशिवाय, नेपाळ सरकारने यापूर्वीही भारताला या वादग्रस्त भागात रस्ते बांधणी किंवा तीर्थयात्रा यांसारख्या हालचाली न करण्याची विनंती केली होती. नेपाळच्या मते, हा भाग त्यांचा असल्याने कोणत्याही परकीय देशाचा हस्तक्षेप खपवून घेतला जाणार नाही. चीनलाही 'मित्र देश' म्हणून नेपाळने लिपुलेखच्या मालकी हक्काबाबत अधिकृतपणे कळवले आहे. 

नेपाली भूमि लिपुलेक हुँदै कैलाश मानसरोवर यात्राका विषयमा मिडियाबाट सोधिएका प्रश्नका सम्बन्धमा परराष्ट्र प्रवक्ताको जवाफ

🔗:https://t.co/Ho5PWyqYCcpic.twitter.com/uNfN25H2N9

— MOFA of Nepal 🇳🇵 (@MofaNepal) May 3, 2026

भारतासोबत हा सीमा प्रश्न सोडवण्यासाठी नेपाळ कटिबद्ध -
मंत्रालयाने म्हटले आहे, की ऐतिहासिक संधी, नकाशे आणि पुराव्यांच्या आधारे भारतासोबतचे मैत्रीपूर्ण संबंध खराब न होऊ देता, हा सीमा प्रश्न राजनैतिक मार्गाने सोडवण्यासाठी नेपाळ कटिबद्ध आहे.