डोनाल्ड ट्रम्प यांचा आता व्हेनेझुएलावर डोळा? ‘अमेरिकेचे ५१वे राज्य’ दर्शवणारी 'ती' पोस्ट चर्चेत

अमेरिकेचे राष्ट्राध्यक्ष डोनाल्ड ट्रम्प यांनी पुन्हा एकदा वादग्रस्त सोशल मीडिया पोस्टमुळे जागतिक राजकारणात खळबळ उडवून दिली आहे.

America-Venezuela: अमेरिकेचे राष्ट्राध्यक्ष डोनाल्ड ट्रम्प यांनी पुन्हा एकदा वादग्रस्त सोशल मीडिया पोस्टमुळे जागतिक राजकारणात खळबळ उडवून दिली आहे. ट्रम्प यांनी त्यांच्या Truth Social या सोशल मीडिया प्लॅटफॉर्मवर व्हेनेझुएलाचा एक नकाशा शेअर केला असून, त्यात त्या देशाला अमेरिकेचे “५१वे राज्य” म्हणून दाखवण्यात आले आहे.

या ग्राफिक फोटोमध्ये व्हेनेझुएलाच्या नकाशावर अमेरिकेचा झेंडा दाखवण्यात आला असून त्यावर “51st State” असे लिहिलेले दिसत आहे. ट्रम्प यांच्या या पोस्टनंतर आंतरराष्ट्रीय स्तरावर राजकीय चर्चा सुरू झाली आहे.

चीन दौऱ्याच्या पार्श्वभूमीवर पोस्ट

ही पोस्ट अशा वेळी समोर आली आहे, जेव्हा ट्रम्प महत्त्वाच्या शिखर परिषदेसाठी चीन दौऱ्यावर रवाना झाले होते. विशेष म्हणजे, व्हेनेझुएलाच्या अंतरिम राष्ट्राध्यक्ष डेल्सी रॉड्रीगस यांनी एक दिवस आधीच “व्हेनेझुएलाने कधीही अमेरिकेचे ५१वे राज्य बनण्याचा विचार केलेला नाही,” असे स्पष्ट विधान केले होते.

त्यांनी असेही म्हटले होते की, जानेवारी महिन्यात अमेरिकन सैन्याने व्हेनेझुएलाचे नेते निकोलस मादुरो यांना ताब्यात घेतल्यानंतरही देशाने अशा कोणत्याही पर्यायाचा विचार केला नाही.

ट्रम्प यांनी आधीही केला होता दावा

विशेष म्हणजे, याआधी सोमवारी ट्रम्प यांनी Fox News  ला दिलेल्या मुलाखतीत व्हेनेझुएलाला अमेरिकेचे नवे राज्य बनवण्याबाबत विचार सुरू असल्याचे संकेत दिले होते. तेलसंपन्न असलेल्या या दक्षिण अमेरिकन देशावर अमेरिकेचा प्रभाव वाढत असल्याचा दावा ते गेल्या काही महिन्यांपासून करत आहेत.

राजकीय विश्लेषकांच्या मते, ट्रम्प यांची ही भूमिका केवळ राजकीय संदेश नसून, ऊर्जा सुरक्षेच्या दृष्टीनेही महत्त्वाची मानली जात आहे. व्हेनेझुएलाकडे जगातील मोठ्या तेलसाठ्यांपैकी एक साठा आहे.

अमेरिकन कंपन्यांसाठी दारे खुली

डेल्सी रोड्रिगस यांनी सत्तेची सूत्रे हाती घेतल्यानंतर अमेरिका-व्हेनेझुएला संबंध सुधारण्याचा प्रयत्न सुरू केला आहे. त्यांच्या सरकारने खनिज आणि तेल क्षेत्र पुन्हा परदेशी कंपन्यांसाठी खुले करण्यास सुरुवात केली असून, विशेषतः अमेरिकन कंपन्यांना गुंतवणुकीची संधी दिली जात आहे. यामुळे अमेरिकेचा आर्थिक आणि राजकीय प्रभाव वेनेझुएलामध्ये वाढण्याची शक्यता व्यक्त केली जात आहे.

व्हेनेझुएलामध्ये निवडणुकांची मागणी

दरम्यान, व्हेनेझुएलातील विरोधकांनी देशात मुक्त आणि पारदर्शक निवडणुका घेण्याची मागणी केली आहे. मात्र निवडणुकांबाबत विचारले असता रोड्रिगेज यांनी, “नेमके कधी होईल हे माहिती नाही, पण कधीतरी निवडणुका होतील,” असे उत्तर दिले.

ट्रम्प यांच्या पोस्टमागे नेमका संदेश काय?

ट्रम्प यांच्या पोस्टकडे अनेकजण राजकीय दबाव तंत्र म्हणून पाहत आहेत. काही विश्लेषकांच्या मते, ही पोस्ट अमेरिकेच्या वाढत्या भू-राजकीय महत्त्वाकांक्षेचे संकेत असू शकतात. तर काहींच्या मते, आगामी निवडणुकांच्या पार्श्वभूमीवर राष्ट्रवादी भावना भडकवण्याचा हा प्रयत्न असू शकतो.