तिरोडा : भरधाव टिप्परने दुचाकीला मागेहून दिलेल्या जोरदार धडकेत दुचाकीस्वार मायलेकाचा घटनास्थळी मृत्यू झाला तर पती गंभीर जखमी झाल्याची घटना गुरुवारी (दि.२३) सायंकाळी ४:४५ वाजताच्या सुमारास तालुक्यातील सुकडी नाका परिसरात घडली. हेमलता चौधरी (वय ३५ वर्षे) व तन्मय चौधरी (वय ९ वर्षे) रा. कासा, ता. गोंदिया असे अपघातात जागीच ठार झालेल्या मायलेकाचे नाव आहे तर कमाऊस धर्मदास चौधरी असे अपघातात गंभीर जखमी झालेल्या पतीचे नाव आहे.
प्राप्त माहितीनुसार कमाऊस चौधरी हे पत्नी व मुलासह गुरुवारी दुपारी आपल्या दुचाकी क्रमांक एमएच-३५ एव्ही ४१०२ ने कासाहून नागपूरकडे जात होते. दरम्यान तिरोडा तालुक्यातील सुकडी नाका जवळ एका भरधाव टिप्परने त्यांच्या दुचाकीला मागेहून जोरदार धडक दिली. ही धडक एवढी जोरदार होती की दुचाकी स्वार हेमलता चौधरी व तन्मय चौधरी यांचा घटनास्थळीच मृत्यू झाला. तर कमाऊस चौधरी हे गंभीर जखमी झाले. घटनास्थळी उपस्थित नागरिकांनी त्वरित या घटनेची माहिती तिरोडा पोलिसांना दिली. तसेच १०८ रुग्णवाहिका बोलावून जखमीला तिरोडा येथील ग्रामीण रुग्णालयात दाखल केले. अपघातानंतर टिप्पर चालक घटनास्थळावरून पसार झाला. तिरोडा पोलिसांनी घटनास्थळ गाठून पंचनामा केला तसेच याप्रकरणी गुन्हा नोंद करुन टिप्पर चालकाचा शोध सुरु केला आहे.
नागपूर येथे करीत होते मजुरीचे काम
कमाऊस चौधरी हे नागपूर येथे मजुरीचे काम करतात. काही कामासाठी ते आपल्या गावी कासा येथे आले होते. गुरुवारी दुपारी ते त्यांच्या दुचाकीने नागपूर येथे जात होते. दरम्यान सुकडी नाक्याजवळ भरधाव टिप्परने त्यांच्या दुचाकीला मागेहून जोरदार धडक दिली.
यात हेमलता चौधरी व तन्मय चौधरी यांचा घटनास्थळीच मृत्यू झाला तर कमाऊस हे गंभीर जखमी झाले. या घटनेमुळे चौधरी कुटुंबीयांवर दु:खाचा डोंगर कोसळला आहे.
Web Summary : A speeding tipper truck collided with a motorcycle near Sukdi Naka, Tiroda, killing a mother and her son. The husband was seriously injured. The tipper driver fled the scene; police are investigating.
Web Summary : तिरोडा के सुकडी नाका के पास एक तेज़ रफ़्तार टिप्पर ट्रक ने एक मोटरसाइकिल को टक्कर मार दी, जिससे एक माँ और उसके बेटे की मौत हो गई। पति गंभीर रूप से घायल हो गया। टिप्पर चालक मौके से फरार हो गया; पुलिस जांच कर रही है।