जिल्ह्यातील डॉक्टरांचे असहकार आंदोलन

शासन नेहमीच आपल्या मागण्याकडे दुर्लक्ष करीत आहेत. त्यामुळे शासनाचे लक्ष वेधण्यासाठी महाराष्ट्र राज्य राजपत्रित वैद्यकीय अधिकारी संघटना (मॅग्मो) ने असहकार आंदोलन सुरू केले आहे.

गोंदिया : शासन नेहमीच आपल्या मागण्याकडे दुर्लक्ष करीत आहेत. त्यामुळे शासनाचे लक्ष वेधण्यासाठी महाराष्ट्र राज्य राजपत्रित वैद्यकीय अधिकारी संघटना (मॅग्मो) ने असहकार आंदोलन सुरू केले आहे. २७ मे ते ३१ मे दरम्यान हे आंदोलन सुरू राहणार असल्याची माहिती संघटनेचे जिल्हाध्यक्ष डॉ.चंदू वंजारे यांनी स्थानिक शासकीय विश्रामगृहात आयोजित पत्रपरिषदेत दिली.

सेवा समावेशवन झालेल्या वैद्यकीय अधिकार्‍यांना पूर्व लक्ष लाभ दिलेला नाही, राज्यातील वैद्यकीय अधिकार्‍यांना सहाव्या वेतन आयोग २00६ पासून लागू केला नाही, अस्थायी एमबीबीएस, बीएएमएस, बीडीएस वैद्यकीय अधिकार्‍यांना अजूनही स्थायी करण्यात आले नाही. केंद्र शासन व इतर राज्याप्रमाणे महाराष्ट्रातील डॉक्टरांना वेतन दिले जात नाही. सेवाअंतर्गत पदव्युत्तर अभ्यासक्रमासंबधीत निश्‍चित धोरण नाही. केंद्रशासन व इतर राज्याप्रमाणे डॉक्टराचे कामाचे तास निश्‍चित करणे व सेवानवृत्तीचे वय ६२ वर्ष करणे तसेच व्यवसायरोध भत्ता ऐच्छीक करण्यात यावे, आरोग्य विभागाचा पुनर्रचना आयोग स्थापन केल्या जावा या मागण्यांना घेऊन मॅग्मोने असहकार आंदोलन सुरू केले आहे. या आंदोलनादरम्यान ३0 मे पर्यंत बाह्य व आंतररुग्ण सेवा सुरू राहणार आहे. उत्तरीय तपासणी व एमएलसी करण्यात येणार आहे. परंतु शासनाच्या सर्व आढावा सभावर डॉक्टरांनी बंदी घातली आहे. कोणत्याही सभेला उपस्थित राहणार नाही असा पवित्रा मॅग्मोने घेतला आहे.

शासनाने ३१ मे पर्यंत डॉक्टरांची दखल घेतली नाही किंवा सकारात्मक विचार केला नाही तर ३१ मे रोजी सकाळी १0 ते दुपारी ३ वाजेपर्यंत जिल्हाधिकारी कार्यालयावर धरणे आंदोलन करून जिल्हाधिकारी पोलीस अधीक्षक, जिल्हा शल्यचिकित्सक व जिल्हा आरोग्य अधिकारी यांना निवेदन सादर करणार आहे. त्यावरही शासन ऐकले नाही तर २ जून रोजी मुंबईच्या आझाद मैदानावर धरणे आंदोलन करण्यात येणार आहे. या असहकार आंदोलनात राज्यातील ७८९ बीएएमएस तर ३२ बीडीएस डॉक्टर सहभागी झाले आहेत.

गोंदिया जिल्ह्यातील जिल्हा परिषद अंतर्गत असलेल्या आरोग्य विभागातील १६२ तर जिल्हा शल्य चिकीत्सक यांच्या अंतर्गत येत असलेले ८२ असे २८४ डॉक्टर असहकार आंदोलनात सहभागी झाले. गोंदिया जिल्ह्यातील २९ डॉक्टर अजूनही अस्थायी आहेत. एमबीबीएस पदव्युत्तर व बीएएमएस पदव्युत्तर वैद्यकीय अधिकार्‍यांना सेवाजेष्ठतेनुसार पदोन्नती देण्यात यावी, वरिष्ठ अधिकार्‍यांना ३ व ६ आगावू वेतन देण्यात यावे या मागण्यांना घेऊन आंदोलन करण्यात येणार आहे. परंतु २ जूनपर्यंत शासनाने सकारात्मक निर्णय न घेतल्यास जिल्ह्यात कामबंद आंदोलन पुकारण्याचा इशारा मॅग्मोने दिला आहे.

यावेळी अध्यक्ष डॉ. चंदू वंजारे, डॉ.विनोद वाघमारे, डॉ. विनोद चव्हाण, डॉ.पी.जी. शेडमेक, डॉ.आर.डी. त्रिपाठी, डॉ. विवेक अनंतवार, डॉ. संजय गुज्जनवार, डॉ. रवि शेंडे, डॉ. अमित खोडणकर, डॉ.उज्वल देवकाते व इतर डॉक्टर उपस्थित होते. (तालुका प्रतिनिधी)