अवकाळी पावसाने सोडे केंद्रावरील हजारो क्विंटल धान भिजले

धानोरा तालुका मुख्यालयापासून तीन किमी अंतरावर असलेल्या सोडे येथील केंद्रावर आविका संस्थेमार्फत ९ डिसेंबर २०१९ पासून धानाची खरेदी सुरू करण्यात आली. आतापर्यंत ४७८ शेतकऱ्यांच्या एकूण १२ हजार ६६४ क्विंटल धानाची खरेदी करण्यात आली. यापैकी केवळ १६०० क्विंटल धानाची उचल महामंडळामार्फत भरडाईसाठी करण्यात आली.

ठळक मुद्देमहामंडळासह शेतकऱ्यांचे नुकसान । उचल कार्यवाहीस विलंब, ताडपत्र्या अपुऱ्याच

लोकमत न्यूज नेटवर्क
धानोरा : आदिवासी विकास महामंडळांतर्गत आदिवासी विविध कार्यकारी सहकारी संस्थेच्या वतीने सोडे येथील केंद्रांवर धानाची खरेदी सुरू आहे. येथे गोदामाची व्यवस्था नसल्याने केंद्राच्या परिसरात ताडपत्री झाकून धान ठेवण्यात अले होते. दरम्यान शुक्रवारी सायंकाळी ६ वाजताच्या सुमारास मेघगर्जनेसह अवकाळी पाऊस बरसला. या पावसामुळे उघड्यावरील धानाचे पोते भिजले. त्यामुळे महामंडळासह शेतकऱ्यांचे नुकसान झाले.
धानोरा तालुका मुख्यालयापासून तीन किमी अंतरावर असलेल्या सोडे येथील केंद्रावर आविका संस्थेमार्फत ९ डिसेंबर २०१९ पासून धानाची खरेदी सुरू करण्यात आली. आतापर्यंत ४७८ शेतकऱ्यांच्या एकूण १२ हजार ६६४ क्विंटल धानाची खरेदी करण्यात आली. यापैकी केवळ १६०० क्विंटल धानाची उचल महामंडळामार्फत भरडाईसाठी करण्यात आली. २१ मार्चपर्यंत सदर केंद्राच्या परिसरात उघड्यावर ११ हजार ६४ क्विंटल धान ठेवण्यात आले होते. महामंडळाने धानावर झाकण्यासाठी सात ताडपत्र्या उपलब्ध करून देण्यात आल्या. मात्र येथे धानाची आवक लक्षात घेता या ताडपत्र्या अपुऱ्या पडत आहेत. दरम्यान शुक्रवारी सायंकाळच्या सुमारास अचानक वातावरणात बदल झाला. मेघगर्जना व गारपीटसह अवकाळी वादळी पावसाने धानोरा शहर व तालुक्याला झोडपले. या वादळामुळे सोडे केंद्राच्या परिसरात धानावर झाकून ठेवलेल्या ताडपत्र्या उडाल्या. परिणामी पावसाने धानाचे पोते भिजले.
सदर केंद्रावर सोडे, नवरगाव, राजोली, पुसावंडी, चिचोली, वाघभुमी, जेवलवाही, मिचगाव बु. येरंडी, मिचगाव खु., बुरानटोला, देऊळगाव, गुजनवाडी, रोटारीटी, भुसूमकुडो आदी १५ गावातील जवळपास एक हजार शेतकरी दरवर्षी आपले धान विक्रीसाठी आणतात. १५ गावासाठी असलेले या केंद्रावर गोदामाची सुविधा नसल्याने आश्चर्य व्यक्त केले जात आहे.