भयंकर! निळ्यानंतर आता 'हिरव्या ड्रम'ची दहशत; पतीसोबत मिळून पत्नीने केली प्रियकराची हत्या

एका महिलेने आपला पती आणि भावाच्या मदतीने प्रियकराची हत्या केली आहे. एवढेच नव्हे तर पुरावा नष्ट करण्यासाठी त्यांनी मृतदेह एका हिरव्या रंगाच्या प्लास्टिक ड्रममध्ये भरून नाल्यात फेकून दिला.

देश अजून 'निळ्या ड्रम' वाल्या बहुचर्चित मर्डर केसच्या दहशतीतून पूर्णपणे बाहेर पडलेला नसतानाच आता मुंब्रा परिसरातून आणखी एक अंगावर काटा आणणारी घटना समोर आली आहे. एका महिलेने आपला पती आणि भावाच्या मदतीने प्रियकराची हत्या केली आहे. एवढेच नव्हे तर पुरावा नष्ट करण्यासाठी त्यांनी मृतदेह एका हिरव्या रंगाच्या प्लास्टिक ड्रममध्ये भरून नाल्यात फेकून दिला. यामुळे आता सोशल मीडियावर 'हिरव्या ड्रम'ची जोरदार चर्चा रंगली आहे. 

मिळालेल्या माहितीनुसार, मुंब्रा परिसरात राहणाऱ्या महिलेचे एका तरुणासोबत प्रेमसंबंध होते. मात्र यानंतर महिलेने आपला पती आणि भावासोबत मिळून प्रियकराला रस्त्यातून हटवण्याचा कट रचल्याचा आरोप आहे. तरुणाची अत्यंत निर्घृणपणे हत्या करण्यात आली. कोणालाही सुगावा लागू नये म्हणून अत्यंत नियोजनबद्ध रीतीने ही हत्या करण्यात आल्याचा पोलिसांना संशय आहे.

पुरावे नष्ट करण्याचा प्रयत्न

हत्येनंतर आरोपींनी पुरावे नष्ट करण्याचा प्रयत्न केला. रिपोर्ट्सनुसार, तरुणाचा मृतदेह एका मोठ्या हिरव्या रंगाच्या प्लास्टिक ड्रममध्ये ठेवण्यात आला आणि त्यानंतर तो मुंब्रा येथील एका नाल्यात फेकून देण्यात आला. स्थानिक लोकांना नाल्याजवळ एक संशयास्पद ड्रम दिसल्यानंतर त्यांनी तातडीने पोलिसांना माहिती दिली. तपास दरम्यान जेव्हा तो ड्रम उघडण्यात आला, तेव्हा आतील दृश्य पाहून सर्वांनाच मोठा धक्का बसला. 

सोशल मीडियावर हिरव्या ड्रमची चर्चा

ही घटना समोर आल्यानंतर सोशल मीडियावर लोक याला “Green Drum Murder Case” म्हणत आहेत. अनेक युजर्सनी जुन्या 'ब्लू ड्रम केस'चा संदर्भ देत म्हटलं आहे की, "आता लोक वेगवेगळ्या रंगांचे ड्रम पाहूनही घाबरू लागले आहेत." इंटरनेटवर या घटनेबाबत प्रचंड संताप आणि भीतीचे वातावरण पाहायला मिळत आहे. "आता हिरव्या ड्रमपासूनही सावध राहण्याची गरज आहे" असं एका युजरने म्हटलं आहे.