खताचे नमुने तपासणीसाठी रवाना

कालबाह्य खताच्या विक्रीचा गोरखधंदा

खामगाव : कालबाह्य झालेले रासायनिक खत थ्रेशरमधून बारीक करुन नवीन थैल्यात भरुन विक्री केल्या जात असल्याचा धक्कादायक प्रकार काल येथे उघडकीस आल्यानंतर आज अमरावती येथील कृषी सहसंचालक अशोक लोखंडे यांनी खताची तपासणी करुन स्टॉक बुक जप्त केले. तर या खताचे नमुने तपासणीसाठी औरंगाबाद येथील प्रयोगशाळेत पाठविण्यात आले. याशिवाय पुण्याचे गुणनियंत्रक आयुक्त जयंत देशमुख यांनीही भेट देवून प्रकरणाची चौकशी केली. यावेळी स्टॉक रजिष्टर तसेच गोदामाच्या भाडेकरारा बाबत कागदपत्रांची पाहणी केली असता त्यामध्ये सुध्दा तफावत आढळून आली. त्यामुळे खताचा हा गोरखधंदा मोठय़ा प्रमाणात सुरू असल्याची बाब उघड होत आहे. येथील औद्योगिक वसाहतीमध्ये मार्केटिंग फेडरेशनचे एकूण २0 गोदाम आहेत. या गोदामापैकी शेवटच्या गोदामात एप्रिल २0११ उत्पादन दिनांक असलेल्या इफको खताच्या थैल्या फोडून त्यामधील ढेकूळ झालेले खत थ्रेशरमधून बारीक करुन तसेच इंडियन फार्मर फर्टिलायझर कंपनी लिमिटेड पारादिप जि.जगतसिंगपूर (ओडिसा) या कंपनीच्या नावे नवीन मे २0१३ उत्पादन दिनांक प्रिंट असलेल्या थैल्यांमध्ये भरुन वजन न करताच सिल करण्यात येत असल्याचा प्रकार उघडकीस आल्यानंतर कृषी विभागाने ६ गोदामांना सील लावले होते. आज अमरावतीचे कृषी सहसंचालक अशोक लोखंडे, अधिक्षक कृषी अधिकारी विवेक सोनोने, कृषि विकास अधिकारी भराड, उपविभागीय कृषी अधिकारी एम.बी.इंगळे यांच्यासह कृषी विभागाच्या अधिकार्‍यांनी यांनी भेटी देवून पंचनामे केले. तसेच वेगवेगळ्या खताचे १३ नमुने घेवून औरंगाबाद येथील प्रयोगशाळेत तपासणीसाठी पाठविले. दरम्यान सायंकाळी राज्य गुण नियंत्रण आयुक्त जयंत देशमुख, मुख्य गुणवत्ता नियंत्रण अधिकारी दिलीप झेंडे यांच्यासह डॉ. जे.आर.टेकाडे, किरण जाधव या अधिकार्‍यांनी भेटी देवून जिल्हा मार्केटिंग फेडरेशनचे अधिकारी यांच्याकडे चौकशी केली.