योग्य औषधोपचाराने कोरोनाला हरवता येते. याचे उत्तम उदाहरण अंबाजोगाई तालुक्यातील पाटोदा (ममदापूर) येथील पठाण कुटुंबीयांनी समोर ठेवले आहे. कुटुंबातील पाच जणांनी कोरोनावर यशस्वी मात केली. त्याबद्दल जि.प. सदस्य राजेसाहेब देशमुख माकेगावकर रविवारी पठाण कुटुंबीयांचा त्यांच्या घरी जाऊन एकत्रित सत्कार केला.
जिल्हा परिषद आरोग्य विभाग, इंटरनॅशनल डेव्हलपमेंट इंडियन असोसिएशन, मानवलोक, ग्रामपंचायत आपेगाव आणि श्री ज्ञानेश्वर शिक्षण संस्थेने श्री जयकिसान महाविद्यालयात उभारलेल्या ५० खाटांच्या कोविड केअर सेंटरमध्ये रुग्णांना दररोज योगाचे धडे, योग्य औषधोपचार, पौष्टिक आहार, आयुर्वेदिक काढा दिला जात आहे. त्यामुळे बाधित रुग्ण हे कोरोनावर मात करून लवकर बरे होत आहेत.
पाटोदा (ममदापूर) येथील पठाण कुटुंबात २० दिवसांपूर्वी कोरोनाने शिरकाव केला. सर्वप्रथम आजोबा बाधित झाल्याने हळूहळू संपूर्ण कुटुंबच बाधित झाले होते; पण न घाबरता सर्वांनी योग्यवेळी कोरोनाच्या चाचण्या केल्या. यात वयोवृद्ध महेबूबखान पठाण (७३) वर्षीय आजोबा, त्यांचा मुलगा बापूखान (४६), सूनबाई बिस्मील्लाबी ( ४४), नातू अमजद (२४), नातू समीर (२२) असे एकूण पाच जण पॉझिटिव्ह निघाले. आजोबांना जास्त त्रास नसला तरी त्यांचे वय पाहता त्यांना आपेगाव येथील कोविड केअर सेंटरमध्ये उपचारासाठी दाखल केले. आरोग्य अधिकारी डॉ. बालासाहेब लोमटे यांच्या मार्गदर्शनाखाली डॉ. भारत नागरे, डॉ. अजय ठोंबरे, डॉ. धनेश्वर मेनकुदळे, डॉ. व्यंकट बेंबडे, डॉ. फड, डॉ. गायत्री ढमाले, परिचारिका कावरे, ढाकणे, कराड, देशमुख, मुंडे, जगदाळे, शिंदे तसेच कर्मचारी अशोक राऊत, बालाजी वाघमारे, रवी सरवदे, अजित बनसोडे यांच्या टीमने आजोबा व सर्व कुटुंबीयांवर यशस्वी उपचार केले. हे कोविड सेंटर एक ‘हॅप्पी होम’ असल्याची प्रतिक्रिया देताना पठाण कुटुंबीयांच्या डोळ्यांत आनंदाश्रू तरळले.
वेळेवर योग्य ती खबरदारी घेतल्यानंतर कोरोना १०० टक्के बरा होतो. कोणतेही दुखणे अंगावर काढू नका. कोरोनाबाधितांचा तिरस्कार करू नका, तर यातून लवकर बरे होण्यासाठी रुग्णांना धीर द्यावा.
- बिस्मिल्लाबी पठाण
कोरोनाला घाबरू नका. तर सकारात्मक विचार ठेवा. नियमित व्यायाम करा. योग्य आहार, औषधोपचार घेतल्यास कोणत्याही रोगावर यशस्वीपणे मात करता येते. आता आम्ही कुटुंबातील सर्वच जण ठणठणीत बरे झालो आहोत.
- अमजद बापूखान पठाण
कोरोना पॉझिटिव्ह आल्यानंतर त्या व्यक्तीला मानसिक आधार, धीर द्या. डॉक्टरांनी धीर देत केलेले उपचार व प्रबोधनामुळे रुग्णालयात कसलीही अडचण आली नाही.
- महेबूबखान रहेमतखान पठाण
मागील काही दिवसांत आपेगाव कोविड केअर सेंटरमध्ये उपचारार्थ दाखल केलेले रुग्ण तणावमुक्त वातावरणामुळे ठणठणीत बरे होण्याचे प्रमाण वाढले आहे. पॉझिटिव्ह विचाराच कोरोनाला हरवू शकतात. ग्रामीण भागातील जनतेने न घाबरता कोरोनाला सामोरे जावे.
-राजेसाहेब देशमुख, जि.प. सदस्य, बीड.)
===Photopath===
310521\31bed_1_31052021_14.jpg