युद्धाचा परिणाम? आता E30 पेट्रोल! इथेनॉल मिश्रण ३० टक्क्यांपर्यंत वाढवण्याची मागणी; कच्च्या तेलाच्या आयातीवर होणार मोठी बचत

E30 Petrol, Diesel India Marathi News: भारतात आता E30 पेट्रोलची तयारी! ऑल इंडिया डिस्टिलर्स असोसिएशनची (AIDA) सरकारकडे ३०% एथेनॉल ब्लेंडिंगची मागणी. कच्च्या तेलाची आयात कमी होणार. वाचा सविस्तर अपडेट.

मध्य पूर्वेतील युद्धाचा भडका आणि कच्च्या तेलाच्या वाढत्या किमतींच्या पार्श्वभूमीवर, 'ऑल इंडिया डिस्टिलर्स असोसिएशन'ने (AIDA) केंद्र सरकारकडे पेट्रोलमध्ये इथेनॉलचे मिश्रण २०% वरून ३०% (E30) पर्यंत वाढवण्याची मागणी केली आहे. इथेनॉल उद्योगाने देशाची इंधन सुरक्षा मजबूत करण्यासाठी आणि महागड्या आयातीवरील अवलंबित्व कमी करण्यासाठी हे महत्त्वपूर्ण पाऊल उचलण्याची तयारी दर्शवली आहे.

AIDA च्या प्रमुख मागण्या
पेट्रोलमध्ये इथेनॉलचे प्रमाण टप्प्याटप्प्याने ३०% पर्यंत वाढवावे, ब्राझीलच्या धर्तीवर १००% इथेनॉलवर चालणाऱ्या फ्लेक्स-फ्युएल वाहनांना (FFVs) प्रोत्साहन द्यावे. पेट्रोलप्रमाणेच डिझेलमध्येही इथेनॉल मिश्रणाच्या शक्यता पडताळून पहाव्यात, ज्यामुळे इंधन खर्च कमी होईल. घरगुती आणि व्यावसायिक वापरासाठी इथेनॉलवर आधारित स्वयंपाकाच्या शेगड्यांना प्रोत्साहन द्यावे.

देशाला काय होणार फायदा?

आयात खर्चात बचत: इथेनॉलचे प्रमाण वाढल्यास कच्च्या तेलाच्या आयातीवर होणारा अब्जावधी डॉलर्सचा खर्च वाचेल.

पर्यावरण रक्षण: इथेनॉल हे स्वच्छ इंधन असल्याने कार्बन उत्सर्जनात घट होईल आणि हवेचे प्रदूषण कमी होईल.

शेतकऱ्यांचे उत्पन्न: ऊस आणि मका उत्पादक शेतकऱ्यांसाठी इथेनॉलची वाढती मागणी उत्पन्नाचा मोठा स्रोत ठरेल.

सध्याची स्थिती
भारताने यापूर्वीच पेट्रोलमध्ये २०% इथेनॉल ब्लेंडिंगचे (E20) उद्दिष्ट वेळेआधीच गाठले आहे. सध्या देशात इथेनॉलची उत्पादन क्षमता अंदाजे २,००० कोटी लिटर असून ३८० हून अधिक डिस्टिलरीज कार्यरत आहेत. वाढीव क्षमतेचा वापर करण्यासाठी आता E30 कडे वळणे गरजेचे असल्याचे एआयडीएने नितीन गडकरी यांना लिहिलेल्या पत्रात म्हटले आहे.