अमरावती लैंगिक शोषण प्रकरण: मुख्य आरोपी अयान अहमदची अचलपूर शहरातून धिंड; गुन्ह्यातील पुराव्यांचा शोध सुरू

Amravati Paratwada viral video case : परतवाडा तरुणींचे लैंगिक शोषण आणि व्हिडिओ व्हायरल प्रकरणातील मुख्य आरोपी अयान अहमद याची पोलिसांनी अचलपूर शहरातून धिंड काढली.

परतवाडा येथील तरुणींच्या लैंगिक शोषणाचे धक्कादायक व्हिडिओ व्हायरल करणाऱ्या प्रकरणातील मुख्य आरोपी अयान अहमद याला पोलिसांनी आज अचलपूरच्या समरसपुरा पोलीस ठाण्यात आणले. त्यानंतर पोलिसांनी त्याची भररस्त्यातून धिंड काढली. गुन्हेगारांमध्ये कायद्याचा धाक निर्माण करण्यासाठी पोलिसांनी हे पाऊल उचलल्याचे बोलले जात आहे.

आरोपी अयान अहमद याला अचलपूर शहराच्या मुख्य भागातून फिरवत त्याची धिंड काढण्यात आली. यावेळी बघ्यांची मोठी गर्दी जमली होती.

मित्रांकडे लपवलेल्या वस्तूंचा शोध
तपासादरम्यान अशी माहिती समोर आली आहे की, अयान अहमद याने त्याच्या एका मित्राकडे काही संशयास्पद वस्तू ठेवल्या होत्या. या वस्तू नेमक्या काय आहेत (मोबाईल, मेमरी कार्ड किंवा इतर पुरावे), याचा शोध पोलीस घेत आहेत.

समरसपुरा पोलिसांची कारवाई
अचलपूरच्या समरसपुरा पोलीस ठाण्याचे पथक या प्रकरणाचा सखोल तपास करत असून, या गुन्ह्यात आणखी कोणाचे सहकार्य लाभले आहे का, याचाही शोध घेतला जात आहे.