विक्रमी मताधिक्याने विजयाचे दावे फोल

यवतमाळ जिल्हा परिषद कर्मचारी सहकारी पतसंस्थेची निवडणूक कधी नव्हे ऐवढी चुरशीची झाली.

यवतमाळ : यवतमाळ जिल्हा परिषद कर्मचारी सहकारी पतसंस्थेची निवडणूक कधी नव्हे ऐवढी चुरशीची झाली. थेट लढत असलेल्या सहकार आणि महासमन्वय पॅनलने केलेले मताधिक्याने विजयाचे दावे फोल ठरले आहे. दोन्ही पॅनलने ५०० ते १००० मताधिक्याने विजयाचा दावा केला होता. एकही विजयी उमेदवार तीन हजार ५०० मतापर्यंत पोहोचला नाही. सर्वाधिक ३ हजार ४६७ मते सहकार पॅनलचे प्रमुख राजूदास जाधव यांनी घेतली. याच पॅनलचे मारोती आत्राम हे केवळ २८ मतांनी विजयी झाले.
७ हजार ७०० मतदार असलेल्या या संस्थेत किमान ५०० पेक्षा अधिक मताधिक्य घेऊन विजयाची अपेक्षा केली जात होती. परंतु कुणीही ३०० पेक्षा अधिक मताधिक्य घेतले नाही. या निवडणुकीत दोन्ही पॅनलचे ३४ आणि इतर नऊ असे ४३ उमेदवार रिंगणात होते. महिला राखीव गटातून दोन्ही पॅनलला प्रत्येकी एका जागेवर विजय मिळाला.
सहकार पॅनलच्या नंदा नागनाथ चाटे या ३ हजार ३२७ मते घेऊन तर महासमन्वय पॅनलच्या सुचिता शांताराम बोंद्रे ३ हजार ३२५ मते घेऊन विजयी झाल्या. याच मतदारसंघातील सहकार पॅनलच्या सुनंदा आनंदराव वडपल्लीवार ३०८४ तर महासमन्वयच्या मानंदा गणपतराव राठोड यांनी ३२१३ मते घेतली. इतर मागासवर्गीय प्रवर्गातून महासमान्वय पॅनलचे मधुकर दिगांबर काठोडे यांनी ३५२६ मते घेत विजय नोंदविला. समन्वय पॅनलचे भानुदास राऊत यांनी ३३१३ मते घेतली.
सर्वात अटीतटीची लढत अनुसूचित जाती/जमाती मतदारसंघात झाली. सहकार पॅनलचे मारोती आत्राम ३३१८ मते घेत विजयी झाले, त्यांनी महासमन्वय पॅनलचे राजू सूर्यवंशी ३२९० यांचा केवळ २८ मतांनी पराभव केला.
विजाभज/विमाप्र मतदारसंघातून सहकार पॅनलचे नंदेशकुमार चव्हाण यांनी ३ हजार ५६१ मते घेत विजय मिळविला. महासमन्वय पॅनलचे साहेबराव पवार यांना ३३३८ मते मिळाली. २२३ मतांनी चव्हाण यांचा विजय झाला.
सर्वसाधारण मतदारसंघातील विजयी उमेदवारांनी घेतलेली मते असे आहेत. सहकार पॅनलचे राजूदास जाधव (३४६७), चित्तरंजन कडू (३३३५), राजेंद्र पिंपळशेंडे (३३१५), डॉ. दिलीप चौधरी (३३०९), प्रवीण राणे (३२७४), दीपक दोडके (३२७१), गौतम कांबळे (३२५९), एकनाथ गाडगे (३२५४), अनिल जयसिंगपुरे (३२४७), शेख लुकमान शेख रहेमान (३२२३), महासमन्वय पॅनलचे संजय गावंडे (३२६२), मुकेश भोयर (३२४१) विजयी झाले.
सकाळी १० वाजता येथी मतमोजणीला सुरूवात झाली. सायंकाळी ४ वाजता निकालाचे चित्र स्पष्ट झाले.
मात्र काही जागांवर फेरमतमोजणी मागण्यात आल्याने रात्री ११ वाजता उमेदवारांच्या विजयाची घोषणा करण्यात आली. निवडणूक निर्णय अधिकारी म्हणून प्रभारी जिल्हा उपनिबंधक अर्चना माळवे यांनी काम पाहिले. (वार्ताहर)