Corona : ऑक्सिजन न मिळाल्याने 3 रुग्णांचा मृत्यू, माजी महापौरानेच सांगितली परिस्थिती

Corona : तीन कोरोना रुग्णांचा मृत्यू : वसई तालुक्यात खळबळ

ठळक मुद्देवसई-विरार महानगरपालिकेच्या हद्दीमध्ये रविवारपर्यंत ५ हजार ७९२ कोरोनाचे रुग्ण असून ते वेगवेगळ्या हॉस्पिटलमध्ये उपचारासाठी दाखल आहेत. यातील काही रुग्णांना ऑक्सिजन लेवल कमी झाल्याने त्यांना ऑक्सिजनची नितांत गरज आहे.

नालासोपारा : वसई-विरार महानगरपालिकेच्या हद्दीमध्ये कोरोना रुग्णांसाठी संजीवनी असलेल्या गॅस ऑक्सिजनचा तुटवडा निर्माण झाला आहे. नालासोपाऱ्याच्या एका हॉस्पिटलमध्ये ऑक्सिजनअभावी तीन कोरोना रुग्णांचा मृत्यू झाल्याची धक्कादायक माहिती समोर आली आहे. मृत्यू झालेल्यांमध्ये एका माजी नगरसेवकाचाही समावेश आहे. ही बाब माजी महापौर राजीव पाटील यांनी सोशल मीडियाद्वारे दिल्याने वसई तालुक्यात एकच खळबळ माजली आहे.

वसई-विरार महानगरपालिकेच्या हद्दीमध्ये रविवारपर्यंत ५ हजार ७९२ कोरोनाचे रुग्ण असून ते वेगवेगळ्या हॉस्पिटलमध्ये उपचारासाठी दाखल आहेत. यातील काही रुग्णांना ऑक्सिजन लेवल कमी झाल्याने त्यांना ऑक्सिजनची नितांत गरज आहे. पण, आता ऑक्सिजनचा तुटवडा निर्माण झाल्याने कोरोना रुग्णांचे हाल होणार अशी चर्चा सुरू झाली आहे. रायगड येथील जेएसडब्ल्यूचे ऑक्सिजनचे फिलिंग स्टेशन असून येथून वसई-विरार महानगरपालिकेला ऑक्सिजन गॅसचा पुरवठा केला जातो. वसई तालुक्यात गॅलेक्सी आणि स्पीड हे दोन रिफलर सेंटर आहे. सदर ऑक्सिजन गॅस वसईत येण्यासाठी वाहतूक व्यवस्था नसल्याने हा तुटवडा निर्माण झाला आहे.

मनपाकडे सध्या तीन तास पुरेल इतका ऑक्सिजन असल्याची माहिती माजी महापौर राजीव पाटील यांनी सोशल मीडियावर व्हायरल केलेल्या मॅसेजमधून देण्यात आली आहे. ऑक्सिजन मिळाला नाही तर कोरोना रुग्णांचे हाल होऊन जीवितहानी होऊ शकते, अशी शक्यता त्यांनी वर्तवली आहे. नालासोपाऱ्याच्या एका प्रसिद्ध हॉस्पिटलमध्ये सोमवारी सकाळपासून ऑक्सिजनमुळे तीन कोरोना रुग्णांचा मृत्यू झाला असल्याचेही त्यांनी सांगितले आहे. या मृत्यूमध्ये बविआचे माजी नगरसेवक किसन मामा बंडांगळे यांचा मृत्यूही ऑक्सिजन न मिळाल्याने झाल्याचे सांगितले.

Read in English