मनोविकारांवरील उपचारांचे विद्यापीठ हरपले; डॉ. आनंद नाडकर्णी यांचे निधन 

मनोविकारतज्ज्ञ आणि ‘इन्स्टिट्यूट फॉर सायकॉलॉजिकल हेल्थ’ अर्थात ‘आयपीएच’ या संस्थेचे संस्थापक डॉ. आनंद नाडकर्णी यांचे शुक्रवारी निधन झाले.

ठाणे : गेली साडेतीन दशके मनोविकारशास्त्राच्या क्षेत्रात बहुमोल कार्य करणारे प्रख्यात मनोविकारतज्ज्ञ आणि ‘इन्स्टिट्यूट फॉर सायकॉलॉजिकल हेल्थ’ अर्थात ‘आयपीएच’ या संस्थेचे संस्थापक डॉ. आनंद नाडकर्णी यांचे शुक्रवारी पहाटे ५  वाजता परळ येथील एका खासगी रुग्णालयात निधन झाले. ते ६८ वर्षांचे होते. 

त्यांच्या पश्चात पत्नी सविता, मुलगा कबीर, मानसकन्या सुखदा असा मोठा परिवार आहे. ‘शहाण्यांचा सायकियाट्रिस्ट’ म्हणून त्यांची ओळख होती. त्यांच्या जाण्याने मनोविकारांवरील उपचारांचे विद्यापीठ हरपल्याची भावना व्यक्त होत आहे. दिलखुलास हास्याची दैवीदेणगी त्यांना लाभली होती.

डॉ. नाडकर्णी यांना मार्च महिन्यात पॅनक्रियाटिक न्यूरोएंडोक्राइन ट्यूमरचे निदान झाले होते. त्यानंतर ६ मे रोजी मुंबईतील एका खासगी रुग्णालयात त्यांच्यावर शस्त्रक्रिया करण्यात आली होती. 

शस्त्रक्रियेनंतर ते बरे होण्याच्या प्रक्रियेत होते. मात्र, १३ मेच्या रात्री त्यांना उलट्यांचा त्रास झाला. त्यानंतर त्यांना ॲस्पिरेशन न्यूमोनिया झाला. त्याच रात्री आतड्याला झालेल्या छिद्रामुळे त्यांच्यावर आणखी एक शस्त्रक्रिया करण्यात आली.

सुरुवातीला त्यांच्या प्रकृतीत सुधारणा दिसून आली होती. मात्र, त्यानंतर हायपोटेन्शनचा त्रास होऊन त्यांना हृदयविकाराचा झटका आला, अशी माहिती डॉ. आनंद नाडकर्णी यांच्या निकटवर्तीयांनी दिली.