Vidhan Sabha 2019: विधानसभा निवडणूक ठरणार मनसेची परीक्षा

२४ मतदारसंघांतील समस्यांचा अभ्यास सुरू; ठाणे-पालघरमध्ये राज ठाकरेंच्या सभा

- अजित मांडके 

ठाणे : लोकसभा निवडणुकीतून माघार घेणाऱ्या महाराष्टÑ नवनिर्माण सेनेने आता विधानसभा निवडणूक लढवण्याचा निर्णय घेतला आहे. त्यानुसार, राज्यात १०० ठिकाणी मनसेकडून उमेदवार दिले जाणार आहेत. त्यातील २४ उमेदवार हे ठाणे आणि पालघर जिल्ह्यांतील असणार आहेत. यामुळे या दोन्ही जिल्ह्यांतील मरगळ आलेल्या कार्यकर्त्यांमध्ये त्यानिमित्ताने का होईना जोश निर्माण झाला आहे. विशेष म्हणजे यानिमित्ताने पक्षप्रमुख राज ठाकरे यांच्या ठाणे, कल्याण-डोंबिवली, अंबरनाथ, बदलापूर आदींसह पालघरमध्ये सभा होणार आहेत. यामध्ये ते भाजपविरोधात पुन्हा डरकाळी फोडणार आहेत. याशिवाय, विधानसभेच्या या कठीण परीक्षेत किती टक्के मिळणार, याचाही अभ्यास मनसे यानिमित्ताने करणार आहे.

लोकसभा निवडणुकीत एकही जागा न लढता केवळ लाव रे तो व्हिडीओमुळे राज यांची चांगलीच चर्चा झाली होती. परंतु, त्यानंतर विधानसभा निवडणूक लढणार की नाही, याबाबतही अनेक तर्कवितर्क लावले जात होते. परंतु, अखेरच्या क्षणी मनसेने १०० जागा लढविण्याचे जाहीर केले. ठाणे आणि पालघरमधील सर्वच जागांवर म्हणजेच २४ जागांवर उमेदवार देण्याचा निर्णयही घेण्यात आल्याची माहिती मनसेच्या सूत्रांनी दिली. त्यासाठी प्रचाराचाही अजेंडा जवळजवळ निश्चित झाला आहे. यामध्ये रस्ते, वीज, पाणी आदींसह मूलभूत सोयीसुविधांची वानवा याची पोलखोल केली जाणार आहे. ठाण्यातील चार मतदारसंघांतूनही अशाच प्रकारे प्रचार केला जाणार असून मनसे सत्तेत आल्यास विकासाची हमीही दिली जाणार आहे.

या निवडणुकीच्या निमित्ताने ठाण्यासह कल्याण, डोंबिवली, अंबरनाथ, बदलापूर आणि पालघर आदी भागांत राज ठाकरे यांची डरकाळी फुटणार असून मोदींची पोलखोल हा कार्यक्रम यानिमित्ताने प्रमुख अजेंडा असणार असल्याची माहिती मनसेच्या सूत्रांनी दिली.
या विधानसभा निवडणुकीच्या निमित्ताने मनसेला मानणारा किंबहुना मराठी मतांचा टक्का किती मनसेला साथ देणार, याचाही अभ्यास या निवडणुकीत होणार आहे.

लोकसभा निवडणूक न लढल्यामुळे मनसेला कुठे, किती मते मिळू शकतात, मनसेच्या मतांचा फटका कोणाला बसणार, हे चित्र स्पष्ट होऊ शकले नव्हते. मात्र, आता विधानसभा निवडणुकीत या सर्वांचीच उत्तरे किंबहुना किती टक्के मते मिळणार, हे स्वत: मनसे आणि इतर पक्षांना समजणार आहे. याच निवडणुकीत मिळविलेल्या मतांच्या जोरावर मनसेचा महापालिकेचा फॉर्म्युलाही निश्चित होणार असल्याचे बोलले जात आहे.

पालघर नगर परिषदेत मनसेचा उमेदवारच नाही
ठाणे जिल्ह्यापेक्षाही पालघर जिल्ह्यात मनसेची स्थिती अवघड आहे. मागील काही वर्षांत मनसेचा या पट्ट्यात तसा कुठेच प्रभाव दिसून आलेला नाही. पालघर नगर परिषदेत तर मनसेला उमेदवारसुद्धा मिळाले नव्हते. त्यामुळे या निवडणुकीतून त्यांनी माघार घेतली होती. जिल्हा परिषद असो किंवा पंचायत समिती, येथेही मनसेचे इंजीन थांबलेलेच म्हणजे त्यांना भोपळाही फोडता आलेला नाही. मागील दीड वर्षापूर्वी मात्र जिल्हाध्यक्ष आणि इतर पदाधिकाऱ्यांची निवड झाल्यानंतर काही आंदोलनाच्या माध्यमातून मनसे येथे आहे, हे थोड्या अंशी चित्रित झाले. एकूणच ठाण्यापेक्षाही पालघरची परीक्षा मनसेसाठी अतिशय अवघड ठरणार असून त्यांना गुणांची टक्केवारी मिळेल की नाही, याबाबतही संभ्रम आहे.