VIP Number: शौक बड़ी चीज है... हिमाचल प्रदेशातील हमीरपूर जिल्ह्यातील एका तरुणाने असं काही केलंय जे पाहून लोक हेच म्हणत आहेत. हिमाचल प्रदेशातील संजीव कुमार यांनी फक्त १ लाख रुपयांच्या स्कूटीसाठी १४ लाख रुपयांचा व्हीआयपी नंबर खरेदी केला. आवडीच्या समोर कोणतीही किंमत दिसत नाही, असं संजीव कुमार म्हणतात. संजीव कुमार यांच्या या महागड्या आवडीची सध्या सोशल मीडियावर खूप चर्चा होत आहे.
हिमाचल प्रदेशात पुन्हा एकदा आवडीच्या गोष्टीसाठी किंमतीची मर्यादा ओलांडण्यात आली आहे. माध्यमांच्या नुसार, हमीरपूर येथील संजीव कुमार यांनी HP21C-0001 हा व्हीआयपी क्रमांक तब्बल १४ लाख रुपयांना खरेदी केला आहे. परिवहन विभागाच्या ऑनलाइन लिलाव प्रक्रियेअंतर्गत त्यांना हा नंबर मिळाला, जो आतापर्यंतचा सर्वात महागडा दुचाकी क्रमांक मानला जात आहे. या लिलावामध्ये फक्त दोन जणांनी भाग घेतला होता. संजीव कुमार यांनी सर्वात जास्त बोली लावल्यामुळे त्यांना हा अनोखा क्रमांक मिळाला.
वाहतूक विभाग व्हीआयपी क्रमांकांसाठी लिलाव करतो, ज्यासाठी ऑनलाइन बोली लावली जाते. हा क्रमांक देखील वाहतूक विभागाच्या ऑनलाइन लिलाव प्रक्रियेद्वारे मिळवण्यात आला होता. या बोलीमध्ये सोलन जिल्ह्यात राहणाऱ्या एका व्यक्तीने १३.५ लाख रुपयांची बोली लावली होती. मात्र संजीव कुमार यांनी त्यांना मागे टाकत त्यांनी हा नंबर १४ लाख रुपयांना खरेदी केला.
त्यानंतर आता ही रक्कम हिमाचल सरकारच्या खात्यात महसूल म्हणून जमा करण्यात आली आहे. यामुळे सरकारला कोणत्याही अतिरिक्त संसाधनांशिवाय १४ लाखांचे उत्पन्न मिळाले आहे. परिवहन विभागाच्या मते, हा आतापर्यंतचा सर्वात महागडा दुचाकी क्रमांक असू शकतो. संजीव कुमार म्हणाले की त्यांना विशेष क्रमांकांची आवड आहे. त्यांनी हा क्रमांक त्यांच्या नवीन स्कूटीसाठी खरेदी केला आहे. आवडीला किंमत नसते आणि जेव्हा तुम्हाला काहीतरी विशिष्ट हवे असते तेव्हा तुम्ही थांबत नाही, असं संजीव कुमार म्हणाले.
दरम्यान, केरळमधून असाच एक प्रकार समोर आला होता. कोची येथील आरटीओने एका लिलावात '०००७' हा नंबर सुमारे ४६ लाख रुपयांना विकला. एका सॉफ्टवेअर कंपनीने त्यांच्या लक्झरी कार 'लॅम्बोर्गिनी उरुस'साठी हा नंबर खरेदी केला होता. या कारची किंमत ४ कोटी रुपयांपेक्षा जास्त असल्याचे सांगितले जाते. लिलावानंतर या कारला 'केएल०७ डीजी ०००७' हा नंबर मिळाला.