"भाऊ, चांगली नोकरी सोडून डिलिव्हरी बॉय का झालास? तरुणाचं उत्तर ऐकून सगळ्यांची बोलतीच बंद!

आजच्या स्पर्धात्मक युगात चांगल्या पगाराची नोकरी मिळवणे हे अनेक तरुणांचे स्वप्न असते. त्यासाठी अतिरिक्त कामाचा ताण, दीर्घ कामाचे तास आणि मानसिक दबाव सहन करण्याची तयारीही अनेकजण ठेवतात. मात्र, केवळ मोठा पगार नव्हे, तर कामातून मिळणारे समाधान आणि वैयक्तिक आयुष्यातील समतोल हे देखील तितकेच महत्त्वाचे असल्याचे एका तरुणाच्या निर्णयातून पुन्हा अधोरेखित झाले आहे.

सोशल मीडियावर सध्या एका २२ वर्षीय तरुणाची कथा मोठ्या प्रमाणात चर्चेत आहे. या तरुणाने आपली स्थिर नोकरी सोडून डिलिव्हरी बॉय म्हणून काम करण्याचा निर्णय घेतला आहे. विशेष म्हणजे, आपल्या आधीच्या नोकरीपेक्षा डिलिव्हरीच्या कामातून अधिक उत्पन्न मिळत असल्याचा दावा त्याने केला आहे. तज्ज्ञाचे मते, कंपन्यासमोर मोठे आव्हान उभे राहिले आहे. त्यामुळे कंपन्यांना फक्त पगारच नव्हे तर, स्कील डेव्हलपमेंट आणि वर्क कल्चर याचाही पुनर्विचार करण्याची गरज आहे. 

संबंधित तरुण साधा कर्मचारी नव्हता.कंपनीकडून त्याला शिकण्यासाठी आवश्यक सर्व संसाधने, पुस्तके आणि तांत्रिक मार्गदर्शन पुरवले जात होते. एवढेच नाही तर त्याला भविष्यातील संधी लक्षात घेऊन आर्टिफिशियल इंटेलिजन्स संबंधित प्रशिक्षणाची ऑफरही देण्यात आली होती. तो अत्यंत हुशार असून लवकरच मोठ्या जबाबदाऱ्या सांभाळू शकेल, असा कंपनीला विश्वास होता. मात्र, काही अतिरिक्त उत्पन्न मिळवण्यासाठी त्याने वीकेंडला डिलिव्हरी बॉय म्हणून काम सुरू केले होते. सुरुवातीला हे केवळ पार्ट-टाइम काम होते, पण काही महिन्यांत त्याला या कामातून मिळणाऱ्या उत्पन्नाचा अंदाज आला. डिलिव्हरीच्या कामातून तो दरमहा सुमारे ३५ ते ४० हजार रुपये सहज कमवू शकतो, असे तो म्हणाला आणि त्याने नोकरी सोडण्याचा निर्णय घेतला. कंपनीने तरुणाला समजवण्याचा आणि नोकरी न सोडण्याचा सल्ला दिला. परंतु, तरुण कुणाचेही ऐकले नाही आणि स्वत:च्या निर्णायावर ठाम राहिला.