कऱ्हाड : कोरोनाच्या पार्श्वभूमीवर बंद असलेली एसटी आता पुन्हा धावणार आहे. येथील आगारातून दोन महिन्यांपासून बंद असलेल्या १३ मार्गांवरील एसटी सेवा सुरु करण्यात आली असून, काही दिवसांतच इतर मार्गांवरील वाहतूकही सुरू केली जाणार असल्याची माहिती आगार व्यवस्थापक विजय मोरे यांनी दिली.
कऱ्हाडच्या येथील एसटी आगारातून दररोज दोन हजारांवर एसटी फेऱ्यांची ये-जा सुरू होती. मात्र, कोरोनामुळे लॉकडाऊन सुरू असल्याने एसटी सेवेवरही त्याचा परिणाम झाला. एसटीची चाके जागेवरच थांबली. त्याचा मोठा आर्थिक फटका एसटी आगाराला बसला. रोजच्या फेऱ्या बंद असल्याने आर्थिक उत्पन्नही बंद झाले होते. त्यानंतर हळूहळू सेवा सुरु करण्यात आली. मात्र, त्यानंतर कोरोना रुग्णांची संख्या झपाट्याने वाढल्याने पुन्हा जिल्हाधिकारी शेखर सिंह यांनी कडक लॉकडाउन सुरू केला. जिल्हाबंदीही केली होती. त्यामुळे एसटीची प्रवासी वाहतूक सेवाही बंद राहिली. सध्या मात्र अनलॉक व्हायला सुरुवात झाली आहे. त्यामुळे एसटीच्या येथील आगारातून सध्या १३ मार्गांवर प्रवासी सेवा सुरु करण्यात आली आहे. त्यामध्ये मुंबई, पुणे, औरंगाबाद, अहमदनगर, सोलापूर, लातूर, उस्मानाबाद, चिपळूण, तासगाव, मिरज, पाटण, शेडगेवाडी, ढेबेवाडी या फेऱ्यांचा समावेश आहे. प्रवाशांनी एसटीच्या प्रवासी सेवेस सहकार्य करावे, असे आवाहन आगार व्यवस्थापक विजय मोरे यांनी केले आहे.