फोटो ओळ : मिरज पंचायत समितीच्या बैठकीस सभापती त्रिशला खवाटे, उपसभापती अनिल आमटवणे, गटविकास अधिकारी आप्पासाहेब सरगर, अशोक नांगर, कृष्णात लोहार, आदी उपस्थित होते.
मिरज : यशवंत पंचायत राज अभियानात यशस्वी होण्यासाठी मिरज पंचायत समितीच्या विभागप्रमुखांनी अपूर्ण कामकाज तत्कळ पूर्ण करावीत, अशी सूचना सभापती त्रिशला खवाटे व उपसभापती अनिल आमटवणे यांनी आढावा बैठकीत दिली.
मिरज पंचायत समिती यशवंत पंचायत राज अभियानात सहभाग घेणार आहे. यामध्ये यशस्वी होण्यासाठी मिरज पंचायत समितीने तयारी सुरू केली आहे. या पार्श्वभूमीवर सभापती त्रिशला खवाटे, उपसभापती अनिल आमटवणे व गटविकास अधिकारी आप्पासाहेब सरगर यांच्या उपस्थितीत मिरज पंचायत समितीच्या विभागप्रमुखांची आढावा बैठक पार पडली.
विभागप्रमुखांच्या कामकाजाचा गटविकास अधिकारी सरगर यांनी आढावा घेतला. अपूर्ण कामकाज असणाऱ्या विभागप्रमुखांना कामे पूर्ण करण्याची सूचना देताना यशवंत पंचायत राजमध्ये यशस्वी होण्यासाठी अधिकाधिक गुण मिळविण्यासाठी कोणत्या बाबी आवश्यक आहेत याची माहिती गटविकास अधिकारी सरगर यांनी दिली.
यावेळी सभापती त्रिशला खवाटे, उपसभापती अनिल आमटवणे यांनीही विभागप्रमुखांना मार्गदर्शन केले. अधिकाऱ्यांचा पंचायत राजमध्ये मिरज पंचायत समिती यशस्वी होण्यासाठी प्रयत्न राहील, असा विश्वास त्यांनी व्यक्त केला.
चौकट
प्रथम येण्यासाठी प्रयत्न करा
मागील वर्षीच्या गुणांमध्ये सुधारणा करण्यासाठी अधिकाऱ्यांनी आपल्या कामात सुधारणा करणे आवश्यक आहे. अपूर्ण कामे तातडीने पूर्ण करून यशवंत पंचायत राजमध्ये मिरज पंचायत समिती राज्यात प्रथम यावी यासाठी विभागप्रमुखांनी जिद्दीने कामकाजाचे नियोजन करण्याची सूचना सभापती त्रिशला खवाटे व उपसभापती अनिल आमटवणे यांनी केली.