Tariff Effect: मिरजेची सतार अमेरिकेत लाखाच्या घरात, निर्यात घसरली

गेल्या तीन महिन्यांपासून तंतुवाद्यांची मागणी थांबली

सदानंद औंधे

मिरज : ‘तंतुवाद्यांचे मोहरघर’ म्हणून ओळखल्या जाणाऱ्या मिरजेत तयार होणाऱ्या दर्जेदार तंतुवाद्यांना अमेरिकेच्या वाढीव टेरिफचा मोठा फटका बसला आहे. अमेरिकेत ५० टक्के आयात कर लावल्याने मिरजेतून होणारी सतार व तांबोऱ्यांची निर्यात केवळ १ ते २ टक्क्यांवर आली आहे. गेल्या तीन महिन्यांपासून तंतुवाद्यांची मागणी जवळपास थांबली आहे.

पूर्वी अमेरिकेत ७० हजार रुपयांपर्यंत उपलब्ध होणारी मिरजेची सतार व तंबोऱ्यांची किंमत आता टेरिफमुळे लाखाच्या घरात पोहोचली आहे. किंमत वाढल्याने अमेरिकेन ग्राहकांची मागणी घटली आहे. निर्यातदार व वाद्य व्यावसायिकांना याचा मोठा फटका बसला आहे. मिरजेतून दरमहा सुमारे ४० सतार व तांबोरे अमेरिकेत पाठविले जात होते. अमेरिकेत भारतीयांची संख्या जास्त असल्याने तिथे तंतुवाद्यांसाठी मोठा ग्राहकवर्ग आहे. 

मात्र ५० टक्के टेरिफ लागू झाल्यानंतर मागणी एकदम कोसळली असून, पूर्वी दिलेल्या ऑर्डरही अनेकांनी रद्द केल्या किंवा थांबविल्या आहेत. मिरजेत तंतुवाद्य व्यवसाय दीडशे वर्षांची परंपरा असून जगभरात येथे तयार होणाऱ्या वाद्यांची ख्याती आहे. दरवर्षी शेकडो वाद्ये अमेरिका, युरोपसह अनेक देशांमध्ये निर्यात होतात. कुरिअर व पोस्टाद्वारे ही वाद्ये विदेशात पाठविली जातात. मात्र गेल्या तीन महिन्यांत अमेरिकेत निर्यात होणारी वाद्ये हाताच्या बोटावर मोजण्याइतकी राहिली आहेत.

निर्यातीचा खर्चही वाढला

आता तंतुवाद्ये कुरिअरद्वारे अमेरिकेत पाठविण्यापूर्वी टेरिफ भरावे लागत असल्याने खर्चही वाढला आहे. याचा तंतुवाद्य निर्मात्यांना आर्थिक फटका बसला आहे.

व्यावसायिकांची केंद्र शासनाकडून अपेक्षा

अमेरिकन टेरिफचा मिरजेतील तंतुवाद्य उद्योगाला तडाखा बसला असून, मिरजेतील व्यावसायिक केंद्र सरकारकडून व्यापार कराराद्वारे उपाययोजना करण्याची मागणी करत आहेत.

गेल्या तीन महिन्यांपासून अमेरिकेतून एकही नवीन ऑर्डर येत नाही. पाठवण्यापूर्वी कर भरावा लागतो. भारत-अमेरिका व्यापार करारातून तोडगा निघेल, अशी आम्ही अपेक्षा करतो. टेरिफ कायम राहिल्यास तंतुवाद्य व्यवसाय संकटात येणार आहे. - मोहसीन मिरजकर, तंतुवाद्य निर्माते, मिरज