शिराळा : राज्यातील आश्रमशाळा कर्मचाऱ्यांच्या वेतनासाठी १४४ कोटी रुपये वेतन अनुदान मंजूर झाले आहे. आश्रमशाळा कर्मचाऱ्यांचे विविध प्रलंबित प्रश्न तसेच वेतन अनुदान याबाबत इतर मागास व बहुजन कल्याण विभागाचे मंत्री विजय वडेट्टीवार यांच्या कार्यालयात बैठक झाली होती. या बैठकीत स्वराज्य शिक्षक संघाच्या वतीने आश्रमशाळा कर्मचाऱ्यांचे प्रश्न मांडले होते. त्याची दखल घेत हे अनुदान तात्काळ मंजूर करण्यात आले आहे, अशी माहिती स्वराज्य शिक्षक संघाचे प्रदेशाध्यक्ष फत्तेसिंह पवार यांनी दिली.
ते म्हणाले, जिल्हा व प्रादेशिक स्तरावर सामाजिक न्याय विभागाचे कर्मचारी असल्याने कामकाजात सुसूत्रता येत नाही. त्यामुळे लवकरच जिल्हा व प्रादेशिक स्तरावर बहुजन कल्याण विभागाचे स्वतंत्र अधिकारी व कर्मचारी नियुक्त करून स्वतंत्ररीत्या कारभार सुरू होणार आहे. कनिष्ठ महाविद्यालयाला दोन शिक्षक वाढवून देण्याचे प्रस्ताव लवकरच मंजूर करण्यात येतील. तसेच रिक्त पदावर व नवीन मंजूर पदाला नियुक्ती देण्यासाठी वित्त विभागाची परवानगी घेऊन लवकरच पदे भरण्यासाठी परवानगी देण्यात येईल. काही पदाच्या वेतनश्रेणीतील विसंगतीदेखील दुरुस्त करण्यात येईल. कनिष्ठ महाविद्यालयाला प्राथमिक व माध्यमिकप्रमाणेच इमारत भाडे लवकरच मंजूर करण्यात येईल. त्याचबरोबर प्राथमिक विभागास सर्व कर्मचाऱ्यांच्या वेतनावर आठ टक्के वेतनेतर अनुदान मंजूर करण्यात येणार आहे.
या बैठकीला आमदार विक्रम काळे, आमदार इंद्रनील नाईक, आमदार डॉ. वजाहत मिर्झा, आमदार मंगेश चव्हाण, बहुजन कल्याण विभागाचे प्रधान सचिव जे.पी. गुप्ता, प्रदेश समन्वयक राजेंद्र बेस्के व प्रदेश सहसरचिटणीस राजेंद्र जगताप उपस्थित होते.