क्रोशिया स्पर्धेत वरुण कुमारला विजेतेपद

क्रोशिया येथील झालेल्या १५ वर्षांखालील बॅटमिंटन स्पर्धेत वरुण कुमारने सर्बियाच्या मिहाजलो टॉमिकचा पराभव करून विजेतेपद

लोकमत न्यूज नेटवर्कपुणे : क्रोशिया येथील झालेल्या १५ वर्षांखालील बॅटमिंटन स्पर्धेत वरुण कुमारने सर्बियाच्या मिहाजलो टॉमिकचा पराभव करून विजेतेपद जिंकून ऐतिहासिक कामगिरी केली. तुर्कीश पॅरा-बॅडमिंटन आंतरराष्ट्रीय स्पर्धेत सुकांत कदमने एकेरी आणि दुहेरी गटाचे उपविजेतेपद पटकवले. म्हाळुंगे-बालेवाडी येथील क्रीडा संकुलात निखिल कानेटकर बॅडमिंटन अ‍ॅकॅडमीत सराव करणाऱ्या वरुण कपूर याने सर्बियाच्या मिहाजलो टॉमिक याचा २२-२०, २१-१७ असा सहज पराभव करून विजेतेपद संपादन केले. वरुणचे हे तिसरे विजेतेपद ठरले. याआधी त्याने सायप्रस २०१६ व इस्त्राईल ओपन २०१७ अशी विजेतेपद संपादन केली होती. तुर्की येथे झालेल्या तुर्कीश पॅरा-बॅडमिंटन आंतरराष्ट्रीय स्पर्धेत एसएल-४ गटातून खेळताना सुकांत कदमला एकेरीमध्ये पराभवाचा सामना करावा लागला. भारतीय खेळाडू सुहास याने सुकांतचा २१-१६, २१-१० असा ३० मिनिटांत सहज पराभव केला. दुहेरीमध्ये सुकांत फ्रेंच खेळाडू मॅथ्यू थॉमस याच्या साथीत खेळताना अंतिम फेरीत या दोघांना पराभव स्वीकारावा लागला. या वर्षी सुकांतने स्पेन येथील स्पर्धेत रजतपदक व युगांडा येथील स्पर्धेत सुवर्णपदक मिळवले होते.