दहावीत झाला वाद; बारावीत घेतला सूड, परीक्षा देऊन बाहेर आलेल्या विद्यार्थ्यावर कोयत्याने वार; पुण्यातील धक्कादायक घटना
By ऑनलाइन लोकमत | Updated: February 25, 2026 17:21 IST2026-02-25T17:20:11+5:302026-02-25T17:21:00+5:30
हल्ल्यात जखमी झालेला १८ वर्षीय विद्यार्थी आणि अल्पवयीन आरोपी हे वारजे भागातील एका शाळेत शिक्षण घेत होते. दहावीत असताना त्यांच्यात वाद झाला होता

दहावीत झाला वाद; बारावीत घेतला सूड, परीक्षा देऊन बाहेर आलेल्या विद्यार्थ्यावर कोयत्याने वार; पुण्यातील धक्कादायक घटना
पुणे : बारावीची परीक्षा देऊन बाहेर पडलेल्या एका विद्यार्थ्यावर कोयत्याने वार केल्याची घटना कोथरूडमधील एका महाविद्यालयाच्या परिसरात मंगळवारी दुपारी घडली. या प्रकरणी कोथरूडपोलिसांनी तीन अल्पवयीनांना ताब्यात घेतले आहे.
हल्ल्यात जखमी झालेला १८ वर्षीय विद्यार्थी आणि अल्पवयीन आरोपी हे वारजे भागातील एका शाळेत शिक्षण घेत होते. दहावीत असताना त्यांच्यात वाद झाला होता. जखमी विद्यार्थी मंगळवारी दुपारी कोथरूड भागातील एका महाविद्यालयात बारावीची परीक्षा देण्यासाठी आला होता. त्यावेळी त्याला आरोपींनी गाठले आणि शिवीगाळ करून त्याच्यावर कोयत्याने वार केले. या घटनेत तो किरकोळ जखमी झाला, अशी माहिती परिमंडळ तीनचे पोलिस उपायुक्त संभाजी कदम यांनी दिली. घटनेची माहिती मिळताच कोथरूड पोलिस ठाण्याचे वरिष्ठ पोलिस निरीक्षक संदीप देशमाने यांनी घटनास्थळी धाव घेतली. हल्लेखोर अल्पवयीनांना ताब्यात घेण्यात आले असून, त्यांच्याकडून कोयता जप्त केला आहे.